ლარსში რუსეთიდან საქართველოში შემომსვლელი ასობით მგზავრია გაჭედილი - რა ვითარებაა ადგილზე
2026 წლის 2 იანვრის მონაცემებით, საქართველო-რუსეთის დამაკავშირებელი ერთადერთი სახმელეთო გზა (ზემო ლარსი და ჯვრის უღელტეხილი) ყველა სახის ტრანსპორტისთვის ჩაიკეტა. მიზეზი ძლიერი თოვა და ზვავის საშიშროებაა.
საზღვართან ასობით ავტომობილია რიგში. მათ შორის არიან ტურისტები და ადგილობრივი მაცხოვრებლები. მგზავრებს შორის ბევრია ბავშვიანი ოჯახი. ტურისტების ნაწილი ჩივის, რომ სასტუმროების ჯავშნები დაეკარგათ, რადგან დანიშნულების ადგილზე დროულად ჩასვლას ვერ ახერხებენ.
გზის გაწმენდითი სამუშაოები უწყვეტ რეჟიმში მიმდინარეობს, თუმცა უამინდობის გამო მოძრაობის აღდგენის ზუსტი დრო ჯერჯერობით უცნობია.
შეზღუდვები საზღვარზე: ვის შეიძლება ეთქვას უარი საქართველოში შემოსვლაზე?
გარდა კლიმატური პირობებისა, რუსეთის მოქალაქეებისთვის საქართველოში შემოსვლა დამატებით ბიუროკრატიულ სირთულეებთანაც არის დაკავშირებული. შვეიცარიის საელჩოსთან არსებულმა რუსეთის ინტერესების სექციამ საკუთარი მოქალაქეები მოსალოდნელი შეფერხებების შესახებ კიდევ ერთხელ გააფრთხილა.
მათი ინფორმაციით, ბოლო პერიოდში საგრძნობლად გახშირდა საზღვარზე უარის თქმის შემთხვევები იმ პირებისთვის, რომელთა პასპორტებში დაბადების ადგილად მითითებულია ოკუპირებული ან სადავო ტერიტორიები. კერძოდ, პრობლემები ექმნებათ მოქალაქეებს, რომელთა დოკუმენტებში ფიქსირდება:
უკრაინის ტერიტორიები: ყირიმი, დონეცკი, ლუგანსკი, ზაპოროჟიე და ხერსონი;საქართველოს ოკუპირებული რეგიონები: აფხაზეთი და ე.წ. სამხრეთ ოსეთი;ამასთანავე, ტურისტებმა უნდა გაითვალისწინონ, რომ 2026 წლის 1 იანვრიდან საქართველოში ძალაში შევიდა ახალი რეგულაცია. კანონმდებლობის თანახმად, ქვეყანაში შემომსვლელი ყველა უცხოელი ტურისტისთვის ჯანმრთელობისა და უბედური შემთხვევის დაზღვევა სავალდებულოა. აღნიშნული დოკუმენტის არქონა შესაძლოა საზღვრის გადაკვეთისას შეფერხების კიდევ ერთი მიზეზი გახდეს.