სასამართლომ დამნაშავედ ცნო 10 ადამიანი, რომლებიც ამტკიცებდნენ, რომ ბრიჯიტ მაკრონი კაცია - ერთ-ერთი ბრალდებული თვლის, რომ სიტყვის თავისუფლება შეუზღუდეს: საქმის დეტალები

საფრანგეთის პირველი ლედის, ბრიჯიტ მაკრონის მიმართ განხორციელებული კიბერ-შევიწროებისა და დამამცირებელი კომენტარების გამოქვეყნებისთვის, რომელსაც მტკიცებულებები არ ახლდა თან, პარიზის სასამართლომ 10 ადამიანი დამნაშავედ ცნო.

• საქმე ეხება ბიჯიტ მაკრონის მიმართ განხორციელებულ კამპანიას, სადაც ბრალდებულები ამტკიცებდნენ, რომ თითქოსდა, ბრიჯიტი რეალურად ტრანსგენდერი მამაკაცი იყო სახელად ჟან-მიშელ ტრუნიუ - რაც სინამდვილეში მისი უფროსი ძმის ნამდვილი სახელია.

ეს ჭორები ჯერ კიდევ 2017 წელს გავრცელდა, როდესაც ემანუელ მაკრონმა საფრანგეთის პრეზიდენტის პოსტზე პირველად იყარა კენჭი. აღნიშნულმა ინფორმაციამ განსაკუთრებული პოპულარობა ბოლო ერთი წლის განმავლობაში მოიპოვა, რისი მიზეზიც ცნობილი "პოდკასტერი" ქენდის ოუენსია, რომელმაც პოდკასტების სერია მიუძღვნა ამ თემას. მაკრონებმა მის წინააღმდეგაც შეიტანეს სარჩელი.

ბრიჯიტ და ემანუელ მაკრონების ურთიერთობა დიდი ხანია, დისკუსიის თემაა. ბრიჯიტი ემანუელზე 24 წლით უფროსია და ის სკოლაში ემანუელის მასწავლებელი იყო. წყვილი წლების განმავლობაში ცდილობდა კრიტიკისა და დაცინვისთვის ყურადღება არ მიექცია, თუმცა ბოლო პერიოდში ამ ბრალდებების გასაჩივრება სასამართლოში დაიწყეს.

სასამართლოს დამნაშავედ ცნო 8 მამაკაცი და 2 ქალი. მათ ბრალად ედებათ ბრიჯიტ მაკრონის გენდერისა და სექსუალობის შესახებ მავნე კომენტარების გაკეთება, მათ შორის მისი და მისი ქმრის ასაკობრივი სხვაობის „პედოფილიასთან“ გათანაბრებაც კი.

• მათ სხვადასხვა სასჯელი მიესაჯათ. ერთს ექვსთვიანი თავისუფლების აღკვეთა პირობითი ვადით. სხვებს კი რვა თვემდე პირობითი პატიმრობა.

დამატებით სასჯელებში შედიოდა ჯარიმები და სავალდებულო კიბერშევიწროების შესახებ ცნობიერების ამაღლების კურსები. ხუთს აეკრძალა იმ სოციალური მედიის პლატფორმის გამოყენება, რომელზეც მათ საკუთარი პოსტები გამოაქვეყნეს ბრიჯიტის შესახებ.

ზოგიერთმა ბრალდებულმა განაცხადა, რომ მათი კომენტარები სატირა იყო, თუმცა სასამართლომ მათი პოზიცია არ გაიზიარა.

55 წლის ბრალდებულმა, მწერალმა ბერტრან შოლერმა განაცხადა, რომ ექვსთვიან პირობით პატიმრობას გაასაჩივრებს

„ეს საშინელებაა. ეს ამაზრზენია. ეს აჩვენებს, თუ რამდენად შორს მიდის ფრანგული საზოგადოება სიტყვის თავისუფლების შეზღუდვასთან დაკავშირებით. სიტყვის თავისუფლება აღარ არსებობს“, - განუცხადა მან სასამართლოში ჟურნალისტებს.

• კვირას საღამოს TF1-თან საუბრისას ბრიჯიტ მაკრონმა გაამართლა კიბერბულინგის წინააღმდეგ ბრძოლა და გამოთქვა იმედი, რომ ეს სხვებისთვის მაგალითი იქნებოდა. მან თქვა, რომ მის წინააღმდეგ ონლაინ თავდასხმები დაუსრულებელი ჩანდა.

“ადამიანები შეიჭრნენ ჩემს საგადასახადო ვებსაიტზე და შეცვალეს ჩემი ვინაობა“, - განაცხადა ბრიჯიტ მაკრონმა.

წყარო

იხილეთ ასევე:

• "ამან დედას ჯანმრთელობაზე იმოქმედა... ის განიცდის შვილიშვილების მდგომარეობას, რომლებსაც სკოლაში დასცინიან" - რა თქვა სასამართლოზე ბრიჯიტ მაკრონის შვილმა