"გამყინვარება" ევროპაში: რომელ ქვეყანაში რა ვითარებაა - დიდი თოვლი, გადაკეტილი გზები, ელექტროენერგიის გარეშე დარჩენილი ხალხი
ევროპა დიდთოვლობას ებრძვის. პარასკევს დილით ჩრდილოეთ საფრანგეთსა და სამხრეთ ინგლისში ათასობით სახლი და ბიზნესი ელექტროენერგიის გარეშე დარჩა.
- ბრიტანეთის ეროვნულმა მეტეოროლოგიურმა სამსახურმა, ხუთშაბათს ინგლისის სამხრეთ-დასავლეთ ნაწილში იშვიათი წითელი გაფრთხილება გამოაცხადა.
"მოსალოდნელია განსაკუთრებით ძლიერი ქარი, რომლის სიჩქარე საათში 160 კილომეტრს (100 მილს) მიაღწევს. ძალიან დიდი ტალღები სანაპირო ზოლში საშიშ პირობებს შექმნის“ - ნათქვამია განცხადებაში.
უამინდობის გამო ღამით სილის კუნძულები დაზარალდა, ინგლისის სამხრეთ-დასავლეთით მდებარე არქიპელაგზე ქარის ნაკადები საათში 159 კმ-ს აღწევდა.
- ადგილობრივი ხელისუფლების წარმომადგენლების ცნობით, გზები გადაკეტილია, შენობები არასტაბილურია, ხოლო ელექტროენერგიის გათიშვის გამო, მოსახლეობის დიდ ნაწილს წყალი არ მიეწოდება.
ეროვნულმა რკინიგზამ დიდი ბრიტანეთის მასშტაბით მოსახლეობას მგზავრობამდე ამინდის პროგნოზის შემოწმებისკენ მოუწოდა. ქარიშხალმა ინგლისში, შოტლანდიასა და უელსში გზებზე შეფერხებები გამოიწვია. ბირმინგემის აეროპორტმა, რომელიც თოვლის გამო დროებით დაიხურა, განაცხადა, რომ ის ხელახლა გაიხსნა „შემცირებული ასაფრენი ბილიკის ოპერირებით“.
გერმანიის მეტეოროლოგიური სამსახურის (DWD) ცნობით, ჩრდილოეთით შესაძლოა 15 სანტიმეტრამდე (ექვსი ინჩი) თოვლი მოვიდეს. DWD-ის მეტეოროლოგის, ანდრეას ვალტერის თქმით, ამ შაბათ-კვირას გარკვეულ რაიონებში ტემპერატურა შესაძლოა -20 გრადუს ცელსიუსამდე დაეცეს. ჰამბურგსა და ბრემენში სკოლები დაიხურა.
ეროვნულმა სარკინიგზო კომპანია „დოიჩე ბანმა“ მომდევნო დღეებში მნიშვნელოვანი შეფერხებების შესახებ გამოსცა გაფრთხილება. ლიანდაგებიდან და პლატფორმებიდან თოვლის მოსაშორებლად 14 000-ზე მეტი თანამშრომელია მობილიზებული.