კვიპროსში, ნიქოზიაში რუსეთის საელჩოს თანამშრომელი საკუთარ კაბინეტში გარდაცვლილი იპოვეს, მანამდე კი ლიმასოლში რუსი ბიზნესმენი გაუჩინარდა - რას წერს მედია მომხდარზე
კვიპროსში, ნიქოზიაში, რუსეთის საელჩოს კომპლექსის ტერიტორიაზე, მაღალი რანგის რუსი დიპლომატი საკუთარ კაბინეტში გარდაცვლილი იპოვეს.
- მანამდე რამდენიმე დღით ადრე, კონკრეტულად კი 7 იანვარს, რუსი მილიარდერი ვლადისლავ ბაუმგერტნერი ლიმასოლში, საკუთარი სახლიდან გაუჩინარდა.
კვიპროსის ოფიციალური პირების განცხადებით, ქვეყანა რუსეთის მხრიდან ორგანიზებული ჰიბრიდული შეტევის მსხვერპლი გახდა მას შემდეგ, რაც გავრცელდა ვიდეო, რომელიც თითქოსდა, მთავრობის კორუფციას ასახავდა.
- რუსი მილიარდერი ვლადისლავ ბაუმგერტნერი ლიმასოლში მდებარე საკუთარი სახლიდან გაუჩინარდა, მასშტაბურმა სამძებრო ოპერაციამ შედეგი არ გამოიღო.
ვლადისლავ ბაუმგერტნერი ოდესღაც რუსეთის ერთ-ერთ ყველაზე გავლენიან კორპორაციულ ფიგურად ითვლებოდა — იგი "ურალკალის“ გენერალური დირექტორი იყო და ბელარუსის კალიუმის კომპანიის თავმჯდომარის პოსტს იკავებდა.
თავად რუსი დიპლომატის გარდაცვალება თვითმკვლელობად შეფასდა. ცხედართან აღმოჩნდა წერილიც, რომელიც საელჩოს პოლიციისთვის არ გადაუცია.
თუმცა გაურკვეველი რჩება, რატომ აეკრძალა ადგილობრივ ხელისუფლებას საელჩოს ტერიტორიაზე შესვლა და რატომ არ მიეცათ ექსპერტიზის ჩატარების უფლება. ასევე, გავრცელებული ინფორმაციით, საელჩოს თანამშრომლებმა კვიპროსის ხელისუფლებას გარდაცვალების შესახებ რამდენიმე დღის დაგვიანებით აცნობეს.
ჯერჯერობით უცნობია, არსებობს თუ არა კავშირი გარდაცვლილი დიპლომატისა და გაუჩინარებული მილიარდერის ამ ორ იდუმალ საქმეს შორის.