მსოფლიოში ყველაზე დიდი აისბერგი მკვეთრი ლურჯი შეფერილობის გახდა და უსწრაფესად დნება - რა ჩანს თანამგზავრიდან გადაღებულ ფოტოებზე და რას ამბობენ მეცნიერები
აისბერგი, სახელწოდებით - A-23A, ანტარქტიდის ფილხნერის შელფურ მყინვარს 1986 წელს გამოეყო და მას შემდეგ ატლანტიკის ოკეანეში დაცურავს.
თუმცა, NASA-ს მიერ გადაღებული ახალი სატელიტური გამოსახულებები აჩვენებს, რომ ყოფილი “ზღვის მეფე“ ამჟამად დნობით გამოწვეული წყლითა და ე.წ ლურჯი ტალახით( დნობის პროცესში წარმოქმნილი ყინულისა და წყლის ნაზავი) არის დაფარული.
- ექსპერტების თქმით, ეს ნიშნები მიუთითებს, რომ მსოფლიოში ერთ-ერთ ყველაზე დიდი აისბერგის სრულ დაშლამდე კვირები, ან სულაც დღეებია დარჩენილი.
თავისი არსებობის ზენიტში A-23A-ს ფართობი დაახლოებით 4 000 კვ.კმ -ს შეადგენდა. ამჟამად ის სამხრეთ ამერიკასა და სამხრეთ ჯორჯიის კუნძულს შორის არსებულ შედარებით თბილ წყლებში გადაადგილდება, რომელიც აისბერგების “სასაფლაოდ“ არის ცნობილი, ამის შედეგად A-23A ზომაში სწრაფად მცირდება.
აშშ-ის ეროვნული ყინულის ცენტრის მეცნიერების შეფასებით, A-23A-ს ფართობი 1 182 კვ.კმ -მდე შემცირდა.
- მერილენდის უნივერსიტეტის მეცნიერის, კრის შუმანის თქმით, “დიდი ალბათობით A-23A ავსტრალიურ ზაფხულს ვერ გადაიტანს“
NASA-ს Terra-ს სატელიტის მიერ 26 დეკემბერს გადაღებული სურათები აჩვენებს, თუ რამდენად მასშტაბური გახდა A-23A-ს დნობის პროცესი.
ფოტოებზე ნაჩვენები ლურჯი მონაკვეთები იმ ადგილებზე მიუთითებს, სადაც დნობის შედეგად წარმოქმნილი წყალი გროვდება და ზედაპირზე უზარმაზარ "დნობად ტბებად“ იყრის თავს.
საერთაშორისო კოსმოსური სადგურიდან ახლო ხედით გადაღებულმა სურათმა აისბერგის ზედაპირზე კიდევ უფრო დიდი ტბა და საოცარი ლურჯ-თეთრი ზოლები აღმოაჩინა. მეცნიერების თქმით, ზოლები სინამდვილეში ის ღარებია, რომლებიც ასობით წლის წინ შეიქმნა, მაშინ როდესაც A-23A ჯერ კიდევ მყინვარის ნაწილი იყო.
-
“როდესაც ყინული გადაადგილდება და სიმძიმის ძალა მას ძირს ექაჩება, მისი მოძრაობის პარალელურად ღრმა ღარები იკვეთება, რომლებიც დღეს მდნარი ყინულის წყლის ნაკადს წარმართავენ“, - ამბობს პროფესორი შუმანი.