Reuters-მა გურულ ჩიჩილაკზე და ახალი წლის ქართულ ტრადიციაზე რეპორტაჟი მოამზადა - "ეს რიტუალი წინა წლის ცუდი გამოცდილებისგან განთავისუფლების სიმბოლოა"

Reuters-ი ახალი წლის გამორჩეული ქართული სიმბოლოს, ჩიჩილაკის შესახებ წერს და რეპორტაჟს გვთავაზობს. გამოცემას ფოტოგრაფმა ირაკლი გედენიძემ და მისმა მეუღლემ, ნათია გედენიძემ უმასპინძლეს. რედაქციამ პირველად იხილა ჩიჩილაკის დაწვის ცერემონიალი.

• “ცენტრალურ საქართველოში, ხის ქოხთან ახლოს, ადგილობრივი მცხოვრები ნათია გედენიძე თოვლში რგავს დეკორატიულ ნაძვის ხეს, რომლის სიმაღლე ერთ მეტრს არ აღემატება და სწრაფად უკიდებს ცეცხლს,“ - წერს Reuters.

"ეს ის ქართული ნაძვის ხეა, რომლითაც ახალ წელს აღვნიშნავთ. ახლა, როდესაც ახალი წლის აღნიშვნა დასრულდა, ყველაფერ ძველს ვწვავთ, ვყრით და ახალ წელს ახალი იმედებით, სიყვარულით ვხვდებით“, - ციტირებს გამოცემა ნათია გედენიძის სიტყვებს, შემდეგ კი ძველი გურული ტრადიციის, ჩიჩილაკის შესახებ მოგვითხრობს:

“ეს ხეები, რომლებსაც "ჩიჩილაკი“ ეწოდება, მზადდება გამხმარი კაკლის ან თხილის ტოტებისგან. მისი ფოჩები მე-4 საუკუნეში მოღვაწე წმინდა ბასილის წვერის სიმბოლოა, რომელიც ღარიბებსა და დაუცველებზე ზრუნავდა.

ჩიჩილაკს, რომელიც პოპულარულია დასავლეთ საქართველოში, მაგრამ გავრცელებულია მთელ ქვეყანაში, ტრადიციულად სახლებში მართლმადიდებლურ შობას, 7 იანვარს დგამენ, ძველს კი წვავენ... ეს რიტუალი წინა წლის ცუდი გამოცდილებისგან განთავისუფლების სიმბოლოა", - წერა გამოცემა.

სტატიაში მოთხრობილია კიდევ ერთ სოფლის მკვიდრ მარიამ გულორდავაზე. ის თავის სახელოსნოში ზის, გარშემო ათობით ჩიჩილაკი უდევს და ოსტატურად თლის ახლებს.

"თხილი კეთილდღეობის სიმბოლოა“, - თქვა მან და დასძინა, რომ ძველი ჩიჩილაკის დაწვის შემდეგ, სახლში ახალი შემოაქვთ, რომელსაც მთელი წლის განმავლობაში ინახავენ.

რეპორტაჟის ავტორები: დავით ჩხიკვიშვილი და ირაკლი გედენიძე; ტექსტის ავტორი: ლუსი პაპაქრისტუ; რედაქტორი: გარეთ ჯონსი.