ესპანეთში მატარებლები ერთმანეთს შეეჯახნენ - დაღუპულია 21 ადამიანი - მატარებელი მალაგიდან მადრიდში მიდიოდა, ლიანდაგიდან გადავიდა და...

ესპანეთის სამხრეთ ნაწილში, მალაგიდან მადრიდის მიმართულებით მოძრავი ჩქაროსნული მატარებელი ლიანდაგიდან გადავიდა და მოპირდაპირე მხრიდან მოძრავ მატარებელს შეეჯახა, რის შედეგადაც, სულ მცირე, 21 ადამიანი დაიღუპა.

• ესპანეთის ტრანსპორტის მინისტრმა ოსკარ პუენტემ ჟურნალისტებს განუცხადა, რომ ავარიის მიზეზი ჯერ კიდევ უცნობია. მისი თქმით, ძალიან უცნაურია, რომ ლიანდაგიდან გადასვლა ლიანდაგის სწორ მონაკვეთზე მოხდა. მისივე ინფორმაციით, ლიანდაგის ეს მონაკვეთი მაისში განახლდა.

ავარია ადამუზთან ახლოს, კორდობას პროვინციაში, მოხდა. მეორე მატარებელი მადრიდიდან უელვის მიმართულებით მოძრაობდა.

ადგილობრივი მედიის ინფორმაციით, სულ მცირე 100 ადამიანი დაშავდა, მათ შორის 25 მძიმე მდგომარეობაშია.

სამხედრო საგანგებო სიტუაციების სამსახურმა დაადასტურა, რომ სამაშველო და აღდგენითი სამუშაოების მხარდასაჭერად ავარიის ადგილთან ახლოს მდებარე სამხედრო ბაზიდან ჯარისკაცები განალაგეს.

ერთ მატარებელში 300-ზე მეტი მგზავრი იმყოფებოდა, მეორეში კი - დაახლოებით 100.