რადიაციული კოსმოსური შტორმი მზეზე - გამოტყორცნილი ნაწილაკები დედამიწისკენ მოემართებიან: რა საფრთხეებზე საუბრობენ მეცნიერები
მეცნიერების თქმით, ბოლო 20 წელზე მეტი ხნის განმავლობაში მზეზე ყველაზე დიდი რადიაციული შტორმი დაფიქსირდა. მათივე მტკიცებით, ის ახლა დედამიწისკენ მოემართება და სავარაუდოდ, ორშაბათს დილით თვალისმომჭრელ პოლარულ ნათებას გამოიწვევს - როდესაც მზისგან გამოტყორცნილი ნაწილაკები დედამიწის მაგნიტურ ველს აღწევენ, ისინი ატმოსფეროში არსებულ აირებთან ურთიერთქმედებენ და ცაზე სხვადასხვა ფერის ნათებას ქმნიან.
- SWPC-ის (ეროვნული მეტეოროლოგიური სამსახურის კოსმოსური ამინდის პროგნოზირების ცენტრი) ცნობით, პოლარული ციალი შესაძლოა აშშ-ის ჩრდილოეთ ნახევარში, სამხრეთით ალაბამამდე და ჩრდილოეთ კალიფორნიამდეც გამოჩნდეს.
როცა მზის შტორმი ჩვენკენ მოდის, მას შეუძლია გავლენა მოახდინოს დედამიწის მაგნიტურ ველზე, რაც თავის მხრივ, იწვევს გეომაგნიტურ შტორმს.
ამ შტორმმა შეიძლება გამოიწვიოს რადიოსიგნალების დარღვევა, GPS ფუნქციონირების ხარვეზები ან ელექტროენერგიის გათიშვა ზოგიერთ ადგილას.
"ამჟამად მიმდინარეობს S4-ის ძლიერი მზის რადიაციული შტორმი - ეს არის ყველაზე დიდი შტორმი ბოლო 20 წლის განმავლობაში. ბოლოს S4 2003 წლის ოქტომბერში დაფიქსირდა", - აღნიშნულია SWPC-ის მიერ X-ზე გამოქვეყნებულ ინფორმაციაში.
- SWPC-ის ცნობით, 2003 წლის ოქტომბერში კოსმოსურმა შტორმმა შვედეთში ელექტროენერგიის გათიშვა და სამხრეთ აფრიკაში ტრანსფორმატორების დაზიანება გამოიწვია.
კოსმოსურ შტორმს შეუძლია გაზარდოს რადიაციული ზემოქმედების რისკი დაბალ ორბიტაზე მყოფი ასტრონავტებისთვის, მაგალითად, საერთაშორისო კოსმოსურ სადგურზე მყოფებისთვის, ასევე პოლარული მარშრუტებით მგზავრებისთვის. მომატებულმა რადიაციამ ასევე შეიძლება საფრთხე შეუქმნას იმ თანამგზავრებს, რომლებსაც კომუნიკაციისა და ნავიგაციისთვის ვეყრდნობით.