გრენლანდიასთან დაკავშირებული შეთანხმების ჩარჩო, "ოქროს გუმბათი" და ტარიფები - რაზე ისაუბრეს ტრამპმა და მარკ რუტემ?

აშშ-ის პრეზიდენტმა, დონალდ ტრამპმა განაცხადა, რომ გრენლანდიასთან დაკავშირებით მომავალი შეთანხმების ჩარჩო ჩამოაყალიბეს და დაგეგმილი ტარიფები ძალაში არ შევა.

• კერძოდ, Truth Social-ზე გამოქვეყნებულ პოსტში მან აღნიშნა, რომ ნატო-ს გენერალურ მდივან მარკ რუტესთან "ძალიან პროდუქტიული შეხვედრის“ საფუძველზე, მათ "შექმნეს გრენლანდიასთან დაკავშირებით მომავალი შეთანხმების ჩარჩო“.

“ძალიან პროდუქტიული შეხვედრის საფუძველზე, რომელიც ნატო-ს გენერალურ მდივან, მარკ რუტესთან მქონდა, ჩამოვაყალიბეთ გრენლანდიასთან და რეალურად, მთლიან არქტიკულ რეგიონთან მიმართებით მომავალი შეთანხმების ჩარჩო.

ეს შეთანხმება, თუ ბოლომდე იქნება მიყვანილი, დიადი იქნება ამერიკის შეერთებული შტატებისა და ნატო-ს ყველა ქვეყნისთვის. ამ შეთანხმებაზე დაყრდნობით, არ დავაწესებ ტარიფებს, რომლებიც 1-ელ თებერვალს უნდა შესულიყო ძალაში.

დამატებითი საუბრები იმართება “ოქროს გუმბათთან” დაკავშირებით, ვინაიდან ის გრენლანდიას ეხება.

საუბრების პროგრესთან ერთად მეტი ინფორმაცია იქნება ხელმისაწვდომი. ვიცე-პრეზიდენტი ჯეი დი ვენსი, სახელმწიფო მდივანი მარკო რუბიო, სპეციალური წარმომადგენელი სტივ უიტკოფი და მრავალი სხვა, თუ საჭირო იქნება, პასუხისმგებლები იქნებიან მოლაპარაკებებზე - პირდაპირ მე ჩამაბარებენ ანგარიშებს”, - წერს ტრამპი.

• ნატო-ს გენერალური მდივნის მარკ რუტეს განცხადებით, გრენლანდიის დანიასთან დარჩენის საკითხი დონალდ ტრამპთან მოლაპარაკებების დროს არ განუხილავთ.

Fox News-თან ინტერვიუში, რუტეს დაუსვეს შეკითხვა, დარჩება თუ არა გრენლანდია დანიის სამეფოს დაქვემდებარებაში იმ ჩარჩო შეთანხმებით, რომელიც ტრამპმა ახსენა.

"ეს საკითხი პრეზიდენტთან საუბრებში აღარ განხილულა. ის (ტრამპი) ორიენტირებულია იმაზე, თუ როგორ შეგვიძლია ეს უზარმაზარი არქტიკული რეგიონი - სადაც ამჟამად ცვლილებები ხდება, სადაც ჩინელები და რუსები სულ უფრო და უფრო აქტიურები არიან, დავიცვათ", - აღნიშნა რუტემ.