ყველაზე მოთხოვნადი პროფესიები საქართველოსა და მსოფლიოში
ადამიანები ადრე თუ ირჩევდნენ იმ პროფესიას, რომელიც აინტერესებდათ და უყვარდათ, ახლა ეს შეიცვალა. მოზარდების უმეტესობა ცდილობს, ჩააბაროს იმ ფაკულტეტზე, რომელიც მომავალში დასაქმებაში დაეხმარება. რამდენიმე წლის წინ, საზოგადოებაში, ყველაზე პოპულარული სამედიცინო, იურიდიული სფერო იყო. თუმცა, ტექნოლოგიების განვითარებამ სრულად შეცვალა იმჟამინდელი რეალობა. სწორედ ეს გახლავთ ერთ-ერთი მიზეზი იმისა, თუ რატომ აბარებს ახალგაზრდების უმეტესობა ბიზნესზე, კომპიუტერულ მეცნიერებებზე, ან იცვლის პროფესიას.
ამ საკითხზე Hr.ge-ის (ადამიანური რესურსების მართვის) რეგიონული მენეჯერი ინგა შახბაძიანი გვესაუბრა.
მისი თქმით, 2025 წელს თუ შევაჯამებთ, თითქმის 50 200 განცხადება განთავსდა Hr.ge-ის საიტზე, 2024 წელს კი - 54 000. აღსანიშნავია, 2025 წელს, 2024 წელთან შედარებით, ვაკანსიების 7%-იანი კლება იყო.
-
თუმცა, საინტერესოა, მათგან ყველაზე მოთხოვნადი რომელი ვაკანსიებია?
"ყველაზე მოთხოვნადი პროფესია გაყიდვების მიმართულებით ფიქსირდებოდა, რომელშიც შედის კონსულტანტის, გაყიდვების მენეჯერის, გაყიდვების აგენტის ვაკანსია. გაყიდვების კატეგორია ვაკანსიების 21%-ს წარმოადგენს.
სასტუმრო - რესტორნის, კვების მიმართულებით ვაკანსიები - 13%, ადმინისტრაცია - 9%, სამედიცინოს მიმართულებით ვაკანსიები - 8%, საბანკო და საფინანსო სექტორის ვაკანსიები - 7%, ლოჯისტიკა-დისტრიბუციის მიმართულებით - 6%, წარმოება - 5%, ინფორმაციული ტექნოლოგიები, აიტი - 4%.
ეს არის ტოპ ყველაზე მოთხოვნადი კატეგორია სხვადასხვა მიმართულების მიხედვით, რაც ჩვენს საიტზე თავსდება“, - აღნიშნავს ინგა შახბაძიანი.
- არანაკლებ საინტერესოა, რა ხდება უცხოური დასაქმების საიტებზე. აშშ-ს შრომის სტატისტიკის ბიურომ შეაფასა სამუშაო ადგილების ზრდის როგორც აშშ-ში, ისე მსოფლიოში ტემპი. ამ მონაცემებზე დაყრდნობით, გამოავლინეს 14 ყველაზე მოთხოვნადი სამუშაო ადგილი. ბევრი სამუშაო ადგილი ჯანდაცვასა და ტექნოლოგიებში შედის.
1. მონაცემთა მეცნიერი - ის განსაზღვრავს ძირითად კითხვებს და იყენებს მონაცემებზე დაფუძნებულ მიდგომებს პასუხების მოსაძებნად. ამ პროფესიის ადამიანების სამუშაო მოიცავს მონაცემთა ნაკრებში შაბლონების პოვნას. მონაცემთა ხარისხის გასაუმჯობესებლად მანქანური სწავლების ტექნიკის გამოყენებას და კომპანიის მასშტაბით დაინტერესებული მხარეებისთვის ინფორმაციის გადაცემას.
2. ინფორმაციული უსაფრთხოების ანალიტიკოსი - მისი მოვალეობაა უსაფრთხოების მონიტორინგი. ამავდროულად, იცავს კიბერუსაფრთხოებას, რათა კომპანიებმა შეინარჩუნონ ძლიერი თავდაცვის სისტემები.
3. ბაზრის კვლევის ანალიტიკოსი - ბაზრის კვლევის ანალიტიკოსები კომპანიის საბაზრო სტრატეგიის მნიშვნელოვან ნაწილს წარმოადგენენ, რადგან ისინი იკვლევენ და გვაწვდიან ქმედით ინფორმაციას კონკურენტების, მომხმარებლებისა და ახალი ბაზრების შესახებ.
4. ფინანსური მენეჯერი - ფინანსური მენეჯერები აკონტროლებენ კომპანიის ფინანსებს, მათ შორის მოგებასა და ხარჯებს. ბიზნესში შემომავალი და გამავალი თანხების მონიტორინგის გარდა, ისინი ამუშავებენ სტრატეგიას ფინანსური გადაწყვეტილებებისთვის.
5. IT მენეჯერი - ისინი ზედამხედველობენ კომპანიის ქსელსა და IT სერვისებს, რაც უზრუნველყოფს, მომხმარებლებს შეუფერხებლად ჰქონდეთ წვდომა საჭირო პროგრამულ უზრუნველყოფასა და ინსტრუმენტებზე.
6. პროგრამული უზრუნველყოფის შემქმნელი - ისინი მუშაობენ იმ პროგრამების შესაქმნელად, რომლებსაც ადამიანები ყოველდღიურად იყენებენ თავიანთ მობილურ მოწყობილობებზე.
7. ვებ დეველოპერი - ვებ დეველოპერები ქმნიან ვებსაიტებს ბრენდებისთვის, კომპანიებისა და კლიენტებისთვის. მათ მინიმუმ უნდა იცოდნენ ერთი პროგრამირების ენა.
8. სტატისტიკოსები - სტატისტიკოსები პრობლემების გადაჭრის სპეციალისტები არიან, რომლებიც იყენებენ მონაცემებს, მათემატიკას და სხვა სტატისტიკურ ინფორმაციას. მათ თავიანთი უნარების გამოყენება მრავალ ინდუსტრიაში შეუძლიათ.
9. სამედიცინო ასისტენტები - სამედიცინო ასისტენტები დახმარებას უწევენ ექიმს კაბინეტებში, საავადმყოფოებსა და სხვა სამედიცინო დაწესებულებებში.
10. დამოკიდებულების მკურნალობის კონსულტანტი - ისინი ეხმარებიან ადამიანებს, რომლებიც სხვადასხვა ნივთიერებაზე არიან დამოკიდებული. მათ შეუძლიათ პაციენტებთან შეხვედრა ინდივიდუალურად ან ჯგუფურად, რათა შეაფასონ პრობლემა.
11. ჯანდაცვის სერვისების მენეჯერი - ჯანდაცვის სერვისების მენეჯერები ჯანდაცვის ადმინისტრაციაში მუშაობენ, რათა ექიმის კაბინეტები, საავადმყოფოები და სხვა პროვაიდერების ლოკაციები ორგანიზებულად და გამართულად იყოს მოწყობილი.
12. ექთან-პრაქტიკოსი - ისინი თავიანთ სფეროში მოწინავეები არიან, რადგან პაციენტებთან კონსულტაციისა და დიაგნოზის დასასმელად ეს როლი რეგისტრირებულ ექთნებთან შედარებით უფრო მაღალ განათლებას მოითხოვს.
13. ფინანსური რისკ მენეჯერი - ისინი იყენებენ მოწინავე სტატისტიკასა და მათემატიკას მომავალი მოვლენების ალბათობისა და პოტენციური ხარჯების გამოსათვლელად, რაც კომპანიებს ეხმარება გადაწყვეტილების მიღებასა და რისკის შემცირებაში.
14. ვეტერინარი - ვეტერინარები არიან სამედიცინო პროფესიონალები, რომლებიც ცხოველებში ჯანმრთელობის პრობლემებს აგვარებენ.
იხილეთ ასევე:
მოამზადა ანი შვანგირაძემ