აფხაზეთიდან ბრიტანეთის მოქალაქე გააძევეს და აცხადებენ, რომ ის სამხედრო ობიექტების შესახებ ინფორმაციებს აგროვებდა - რა დეტალებია ცნობილი?

ოკუპირებული აფხაზეთის ტერიტორიიდან ბრიტანეთის მოქალაქე გააძევეს.

აფხაზეთის ე.წ. სახელმწიფო უსაფრთხოების სამსახურის ცნობით, 26 იანვარს "უცხოური სპეცსამსახურების წინააღმდეგ ბრძოლის ფარგლებში", უწყების შენობაში მიიყვანეს ბრიტანეთის მოქალაქე, კულდიპ სინგჰი, რომელიც "ეჭვმიტანილია უცხოური სპეცსამსახურების საქმიანობაში შესაძლო მონაწილეობაში".

• "აფხაზეთში არსებული კავშირებისა და კონტაქტების გამოყენებით, მან შეიმუშავა გეგმა, რომელიც საშუალებას მისცემდა, მიეღო მონაცემები აფხაზეთში დასახლებული პუნქტების, სამხედრო ობიექტების და სხვა ინფრასტრუქტურის ადგილმდებარეობის შესახებ", - განაცხადეს "უსაფრთხოების სამსახურში".

ასევე გამოაქვეყნეს ვიდეო, სადაც სინგჰი ამბობს, რომ 13 წელი ლონდონის პოლიციის სადაზვერვო დანაყოფში მუშაობდა, მაგრამ სამსახურის დატოვება კორუფციის გამო მოუწია.

შემდეგ კი ამბობს, რომ ათი თვის განმავლობაში ცხოვრობდა რუსეთში.

ბრიტანეთის მოქალაქე ამბობს, რომ როდესაც აფხაზეთში გადავიდა, იქ ასწავლიდა ინგლისურს, ასევე ჰქონდა საბილიარდო დარბაზი. კაცმა ასევე თქვა, რომ აფხაზეთში კანონიერად ცხოვრებისთვის ვერანაირი დოკუმენტი ვერ მიიღო, რადგან ბრიტანული პასპორტის ვადა ამოწურული ჰქონდა.