მომაკვდინებელ ზამთრის შტორმს 15 ადამიანი ემსხვერპლა, აშშ “დიდი გამყინვარების“ კიდევ ერთ ტალღას ელის - განახლებული ცნობები სტიქიის ზონიდან (ფოტოები)
აშშ-ში ზამთრის შტორმით გამოწვეული ქაოსი გრძელდება. სტიქიის გამო გამოწვეული საფრთხის ქვეშ აღმოჩნდა ქვეყნის უმეტეს შტატში მცხოვრები 200 მილიონზე მეტი ადამიანი.
-
რამდენიმე შტატში, მათ შორის ტეხასში, ლუიზიანაში, ტენესის შტატში, პენსილვანიასა და სამხრეთ კაროლინაში, ქარიშხლისა და ყინვის შედეგად 15-ზე მეტი ადამიანი დაიღუპა. კიდევ რამდენიმე გარდაცვალების ფაქტზე გამოძიება მიმდინარეობს.
ეროვნული მეტეოროლოგიური სამსახურის ცნობით, რიგ შტატებში თოვლის საფარის სიმაღლე ერთ მეტრამდე იყო. სინოპტიკოსები მოსახლეობას აფრთხილებენ, რომ ამ შაბათ-კვირას კიდევ ერთი შტორმია მოსალოდნელი.
- შტატების სამხრეთ ნაწილში, ქარიშხლის შედეგად წარმოქმნილმა ყინულმა ელექტროენერგიის ფართომასშტაბიანი გათიშვა გამოიწვია. მნიშვნელოვნად დაზიანდა ინფრასტრუქტურა სამხრეთის დიდ ნაწილში. შეზღუდულია გზებზე გადაადგილება, თოვლმა დააზიანა ხეები და ელექტროგადამცემი ხაზები.
ვებსაიტ poweroutage.us-ის თანახმად ელექტროენერგია ასობით ათას მომხმარებელს აღუდგა, თუმცა, ნახევარ მილიონზე მეტი მომხმარებელი ამ დრომდე ელექტროენერგიის გარეშეა დარჩენილი.
FlightAware-ის მონაცემებით, ავიაკომპანიებმა კვირას 11 600-ზე მეტი რეისი გააუქმეს. ორშაბათს კი აშშ-ში 6000-ზე მეტი რეისი გაუქმდა.
იხილეთ ასევე:
- აშშ-ში ზამთრის შტორმის გამო დაღუპულთა რიცხვი 11-მდე გაიზარდა, მილიონზე მეტი აბონენტი ელექტროენერგიის გარეშეა დარჩენილი: უახლესი ცნობები სტიქიის ზონიდან
- გარდაცვლილები, გაუქმებული რეისები აეროპორტში და ელექტროენერგიის გარეშე დარჩენილი 800 000-ზე მეტი აბონენტი - აშშ “დიდ გამყინვარებას“ ებრძვის: რა ხდება ქვეყანაში (ფოტო/ვიდეო)