ქარხანაში საახალწლო ნამცხვარი გაჭრეს, რამდენიმე საათში კი აფეთქებას 5 ქალი ემსხვერპლა - საბერძნეთში მომხდარი შემზარავი ტრაგედიის დეტალები

ტრაგედიამ, რომელიც საბერძნეთის ქალაქ ტრიკალაში, ორცხობილების ცნობილ ქარხანა "ბიოლანტაში“ დატრიალდა, მთელი ქვეყანა შეძრა. 26 იანვარს, გამთენიისას მომხდარ აფეთქებას და ხანძარს ხუთი ქალის სიცოცხლე ემსხვერპლა. ელენა, ვასილიკი, ვულა, ანასტასია და აგაპი - ეს ის სახელებია, რომლებიც საბერძნეთისთვის დიდი ტკივილის სიმბოლოდ იქცა.

• ბოლო ფოტო და საბედისწერო გადაწყვეტილება

ყველაზე მძიმე ამ ისტორიაში ის ფაქტია, რომ ტრაგედიამდე სულ რამდენიმე საათით ადრე, ქარხანაში საზეიმო განწყობა სუფევდა. თანამშრომლები ტრადიციულ საახალწლო ნამცხვარს - "ვასილოპიტას“ ჭრიდნენ და ერთმანეთს წარმატებულ წელს უსურვებდნენ. გავრცელებულ კადრებში ჩანს მოღიმარი ქალები, რომლებმაც არ იცოდნენ, რომ ეს მათი ბოლო შეხვედრა იყო.

იმ ღამეს ცვლაში 30 ადამიანი უნდა ყოფილიყო, თუმცა, სწორედ ამ საზეიმო ღონისძიების გამო, დირექტორმა თანამშრომლების ნაწილი სახლში ადრე გაუშვა და ქარხანაში მხოლოდ 12 ადამიანი დარჩა. სამწუხაროდ, ხუთი მათგანისთვის ეს ღამე უკანასკნელი აღმოჩნდა.

ხუთი დასრულებული სიცოცხლე: ვინ იყვნენ დაღუპულები?

• ელენა კაცარუ: 13 წლის ბიჭის დედა. ელენა მრავალი წლის განმავლობაში მუშაობდა ამ ქარხანაში. ის კარგად იცნობდა იქაურობას, ყოველ კუთხე-კუნჭულს, თუმცა სწორედ იქ, რომელიც მისთვის მეორე სახლად ქცეულიყო, ცეცხლის ალში მოექცა და გამოსვლა ვეღარ შეძლო.
• ვასილიკი სკამპარდონი: ორი არასრულწლოვანი შვილის დედა. 2020 წლამდე ის სტილისტად მუშაობდა, თუმცა ოჯახის ეკონომიკური სტაბილურობისთვის მუშაობა ქარხანაში დაიწყო. ვასილიკის მეუღლე შოკურ მდგომარეობაშია - ახლა კი შვილების გაზრდა მარტოს მოუწევს.
• ვულა (სტავრულა) ბუკოვალია: სამი შვილის დედა. აფეთქების მომენტში ის უშუალოდ საწარმოო ხაზთან იმყოფებოდა.
• ანასტასია ნასიუ: ქალი, რომელმაც ცხოვრების დიდი ნაწილი გერმანიაში, ემიგრაციაში გაატარა. ის მძიმედ შრომობდა უცხო მიწაზე და საბერძნეთში მხოლოდ იმისთვის დაბრუნდა, რომ მშვიდად გასულიყო პენსიაზე და სიბერე სამშობლოში გაეტარებინა.
• აგაპი მპუნოვა: მეუღლე, დედა და ბებია. ის იყო ოჯახის მთავარი დასაყრდენი, რომელიც ყველას აერთიანებდა.

• 

• კომპანიის პასუხი და დაპირებული დახმარება

ქარხანა "ბიოლანტამ“ ოფიციალური განცხადება გაავრცელა, სადაც ნათქვამია, რომ ისინი გლოვობენ თავიანთ "ოჯახის წევრებს“. კომპანიამ მიიღო გადაწყვეტილება, გარკვეული ფინანსური პასუხისმგებლობა აიღოს დაღუპულთა ოჯახებზე:

ოჯახები ყოველთვიურად მიიღებენ იმ ხელფასს, რომელსაც ქალები პენსიაზე გასვლამდე აიღებდნენ;

არასრულწლოვანი შვილები მიიღებენ ყოველთვიურ დახმარებას სრულწლოვანებამდე;

კომპანიამ დაუყოვნებლივ გადაიხადა 6 თვის ხელფასის ოდენობის თანხა პირველადი ხარჯებისთვის.

• გაურკვეველი მიზეზები

მიუხედავად იმისა, რომ კომპანია აცხადებს, რომ უსაფრთხოების ყველა პროტოკოლს იცავდა, გამოძიება გრძელდება. მეხანძრეები და მაშველები კვლავ მუშაობენ შემთხვევის ადგილზე, რათა დაადგინონ, რამ გამოიწვია სარდაფში მძლავრი აფეთქება, რომელმაც წამებში გაანადგურა ხუთი ადამიანის სიცოცხლე.