ცნობილი ხდება, სავარაუდოდ რომელ საელჩოზე იგეგმებოდა ბაქოში ტერორისტული თავდასხმა - რა დეტალებზე წერს მედია?
აზერბაიჯანის სახელმწიფო უსაფრთხოების სამსახურმა ბაქოში ერთ-ერთ საელჩოზე ტერორისტული თავდასხმის მცდელობა აღკვეთა, - ინფორმაციას ადგილობრივი მედია ავრცელებს.
ისრაელის მედიისა და რადიო "თავისუფლების“ აზერბაიჯანული წყაროების ცნობით, სამიზნე ისრაელის საელჩო იყო.
- აზერბაიჯანის სახელმწიფო უსაფრთხოების სამსახურის განცხადებით, სამი პირი დააკავეს, რომლებიც ე.წ. ისლამურ სახელმწიფო - ხორასანის ბრძანებით საელჩოზე ტერორისტულ თავდასხმას გეგმავდნენ.
უწყების განცხადებაში აღნიშნულია, რომ სამმა პირმა - ილგარ გულიევმა, ამინ პირიევმა და ელვინ ალიზადამ იარაღები შეიძინეს და რელიგიურ ნიადაგზე ტერორისტული თავდასხმისთვის ემზადებოდნენ.
ტერორისტული თავდასხმის ჩაშლის შესახებ ცნობილი გახდა ისრაელის საგარეო საქმეთა მინისტრის, გიდეონ საარის, ბაქოში ოფიციალური ვიზიტის დროს.
26 იანვარს მან შეხვედრები გამართა აზერბაიჯანის პრეზიდენტ ილჰამ ალიევთან და სხვა მაღალი რანგის ოფიციალურ პირებთან.
ვიზიტის დროს საარმა განიხილა ისრაელსა და აზერბაიჯანს შორის ორმხრივი ურთიერთობების გაღრმავება, მათ შორის, სხვადასხვა სფეროში თანამშრომლობა.
ზუსტად არ არის ცნობილი, როდის დააკავეს ბრალდებულები. ისრაელის წყაროები ვარაუდობენ, რომ თავდასხმა შესაძლოა, ნოემბერშიც კი იყო დაგეგმილი. იმ დროს ბაქოში ევროპელი რაბინების მნიშვნელოვანი კონფერენცია იგეგმებოდა. ღონისძიება საბოლოოდ ისრაელის უსაფრთხოების სამსახურების რეკომენდაციის შემდეგ გაუქმდა. კონფერენცია ისრაელში გადაიტანეს და 26 იანვარს გაიხსნა.
- "ვილაიათ ხორასანის“ დაჯგუფება ავღანეთში 2014–2015 წლებში გაჩნდა. ჯგუფის წევრები სალაფიტები არიან და დაარსების დღიდან სასტიკად ეწინააღმდეგებიან "თალიბანს".
2021 წელს ავღანეთში "თალიბანის" ხელისუფლებაში მოსვლის შემდეგ, "ვილაიათ ხორასანი“ ნახევრად მიწისქვეშა ქსელად გარდაიქმნა და ავღანეთის გარეთ, ძირითადად ცენტრალური აზიის ქვეყნებში, გარე ოპერაციებსა და რეკრუტირებაზე იყო ორიენტირებული.
გაეროს ექსპერტების მონაცემებით, ჯგუფს 3-ათსამდე წევრი ჰყავს. "ვილაიატ ხორასანი“ პასუხისმგებელია 2021 წელს ქაბულის აეროპორტში მომხდარ ტერორისტულ თავდასხმაზე, რომლის შედეგადაც 180-ზე მეტი ადამიანი დაიღუპა, ირანსა და პაკისტანში განხორციელებულ თავდასხმებზე, ასევე რეგიონის გარეთ განხორციელებულ თავდასხმის მცდელობებსა და თავდასხმებზე.