რუს ქალს თბილისში მოხალისესთან მიმოწერისთვის სამშობლოს ღალატში ადანაშაულებენ - რას წერს მედია?
კურსკის ოლქის 43 წლის მცხოვრები სვეტლანა ტოლკაჩევა სამშობლოს ღალატის ბრალდებით (რუსეთის სისხლის სამართლის კოდექსის 275-ე მუხლი) დააკავეს - ორგანიზაცია Volunteers.Tbilisi-ის თბილისელ მოხალისესთან მიმოწერისთვის. ამის შესახებ რუსული პროექტი "მემორიალი“ იტყობინება.
- მათივე ცნობით, ქალი პირველად 2025 წლის მაისში დააკავეს "ტერორიზმის დაფინანსებაში ჩართული პირების შესაძლო უკანონო საქმიანობის გარემოებების დასადგენად“. შედგა ოქმი, რომელშიც ნათქვამია, რომ დაკითხვის დროს მან უცენზურო სიტყვები გამოიყენა და უარი თქვა კურსკის ეფ-ეს-ბე-ს თანამშრომლების მოთხოვნების შესრულებაზე. ტოლკაჩოვას 12 დღით თავისუფლების აღკვეთა მიესაჯა.
"მემორიალის" ცნობით, ადმინისტრაციული პატიმრობის მოხდისას, იგი წინასწარი დაკავების იზოლატორიდან საკუთარ სახლში გადაიყვანეს.
"ჩვენი წყარო იუწყება, რომ FSB-ის ოფიცრებმა სტანისლავ ბაზდირევმა და ალექსანდრე გორლოვმა ტოლკაჩოვა ელექტროშოკით აწამეს. ის იძულებული გახდა, დაკითხვის ოქმისთვის ხელი მოეწერა მაშინ როცა ეს ოქმი წაკითხულიც კი არ ჰქონდა
მოხალისე ალექსეი ლებედევთან მიმოწერა კი საქმის გასაყალბებლად გამოიყენეს. ამ "ოპერატიული ზომების“ შემდეგ, ქალის ტელეფონზე გამოჩნდა სვასტიკისა და აზოვის ემბლემის სურათები, რომლებიც მანამდე იქ არ იყო“, - წერს "მემორიალი".
- 2025 წლის 27 მაისს, ტოლკაჩევა სპეციალური დაკავების ცენტრიდან გაათავისუფლეს. "მემორიალის“ ცნობით, უსაფრთხოების ძალები მას შვიდი თვის განმავლობაში უთვალთვალებდნენ, ხოლო 25 დეკემბერს სახელმწიფო ღალატის ბრალდებით დააკავეს და წინასწარი დაკავების ცენტრში გადაიყვანეს.
ადამიანის უფლებათა დამცველების თქმით, ტოლკაჩევა ორგანიზაცია "Volunteers.Tbilisi“-სთვის შეწირულობებს 2022 წლის ზაფხულიდან ახორციელებდა. 2023 წელს მას საქართველოში მოხალისედ ჩამოსვლა სურდა, მაგრამ კიბოს გამო ამის გაკეთება ვერ შეძლო.
"Volunteers.Tbilisi“-ს გუნდმა ომის მსხვერპლთა დახმარება 2022 წლის მარტში დაიწყო. ცოტა ხნის წინ, ორგანიზაციამ განაცხადა, რომ საქართველოში ჰუმანიტარულ დახმარებასა და საქმიანობას წყვეტდა და მხოლოდ საკონსულტაციო მომსახურებას ინარჩუნებდა.