ქორწინების გარეშე სექსისთვის და ალკოჰოლის მიღებისთვის ინდონეზიაში წყვილი საჯაროდ გაროზგეს - ჯოხის 140-ჯერ დარტყმის შემდეგ ქალმა გონება დაკარგა
ინდონეზიაში, აჩეჰის პროვინციაში, პოლიციამ წყვილი შარიათის კანონით გაასამართლა და 140-ჯერ წკეპლის დარტყმა მიუსაჯა - მიზეზი ალკოჰოლის მიღება და ქორწინების გარეშე სექსია.
- როგორც მედია წერს, ეს სავარაუდოდ, ერთ-ერთი ყველაზე მკაცრი სასჯელია მას შემდეგ, რაც ღრმად კონსერვატიულმა რეგიონმა შარიათის კანონი მიიღო.
აჩეჰის პროვინციაში დაუქორწინებელ წყვილს შორის სექსუალური ურთიერთობა მკაცრად აკრძალულია.
წყვილი - ქალი და მამაკაცი საჯაროდ, ერთ-ერთ პარკში, ათობით ადამიანის თვალწინ დასაჯეს. მათ ზურგზე ჯოხს ურტყამდნენ. ჯოხის 140-ჯერ დარტყმის შემდეგ, ქალმა გონება დაკარგა და ის სასწრაფო დახმარების მანქანით კლინიკაში წაიყვანეს.
როგორც ამ პროვინციის შარიათის პოლიციის უფროსმა, მუჰამედ რაზალმა AFP-ს განუცხადა, წყვილს ჯამში 140-ჯერ დარტყმა მიესაჯა - 100 ქორწინების გარეშე სექსისთვის და 40 ალკოჰოლის მოხმარებისთვის.
- მათ გარდა კიდევ რამდენიმე ადამიანი გაროზგეს. მათ შორის, შარიათის პოლიციელი ქალი ქალთან სექსუალური ურთიერთობისთვის - მას წკეპლა 23-ჯერ დაარტყეს.
"ჩვენ გამონაკლისს არ ვუშვებთ, განსაკუთრებით ჩვენივე წევრებისთვის", - თქვა მედიასთან ადგილობრივი პოლიციის უფროსმა.