"რა დააშავეს იმ ბავშვებმა?!" - ისრაელის მორიგი საჰაერო იერიში ღაზაში - დაიღუპა სულ მცირე, 32 ადამიანი

ისრაელმა ღაზას სექტორზე ავიაიერიში მიიტანა. ადგილობრივი ხელისუფლების ინფორმაციით, საჰაერო დარტყმების ტალღის შედეგად, სულ მცირე, 32 ადამიანი დაიღუპა.

"ჰამასის" მიერ მართულ სამოქალაქო თავდაცვის სააგენტოს ცნობით, დაღუპულთა შორის ბავშვები და ქალები არიან. მათივე ინფორმაციით, სამხრეთ ქალაქ ხან იუნისში იძულებით გადაადგილებულ პირთა კარავში მოწყობილ თავშესაფარს დაარტყეს.

• პალესტინელები ამ დარტყმებს ყველაზე მძიმე დარტყმებს უწოდებენ მას შემდეგ, რაც გასული წლის ოქტომბერში აშშ-ის პრეზიდენტის, ტრამპის შუამავლობით მიღწეული ცეცხლის შეწყვეტის მეორე ფაზა ამოქმედდა.

ისრაელის სამხედროებმა დაადასტურეს, რომ დარტყმები განახორციელეს. ისინი აცხადებენ, რომ ეს "ჰამასის" მიერ ცეცხლის შეწყვეტის შეთანხმების დარღვევაზე პასუხია.

ისრაელმაც და "ჰამასმაც" ზავის დარღვევაში ერთმანეთი დაადანაშაულეს.

ისრაელის თავდაცვის ძალების (IDF) განცხადებით, აღმოსავლეთ რაფაჰში იდენტიფიცირებული იყო 8 ტერორისტი და ისრაელის უსაფრთხოების სააგენტოსთან (ISA) ერთად, მათ სხვადასხვა სამიზნეებს დაარტყეს, მათ შორის "ოთხ მეთაურსა და დამატებით ტერორისტებს“, ასევე იარაღის საწყობს, იარაღის წარმოების ადგილს და "ჰამასის კუთვნილ ორ სასროლ წერტილს ცენტრალურ ღაზაში“.

• "ჰამასმა" დაგმო დარტყმები და მოუწოდა აშშ-ს დაუყოვნებლივ ზომების მიღებისკენ და დასძინა, რომ ისრაელის ქმედებები ადასტურებს, რომ ისრაელის მთავრობა "აგრძელებს გენოციდს ღაზას სექტორის წინააღმდეგ“.

"ჰამასის" წარმომადგენელი ამბობს, რომ ჭურვები საცხოვრებელ ბინებს, კარვებს, თავშესაფრებს და პოლიციის განყოფილებას მოხვდა.

ღაზას საავადმყოფოს ექიმებმა განაცხადეს, რომ საჰაერო დარტყმის შედეგად საცხოვრებელი ბინა დაზიანდა, რის შედეგადაც სამი ბავშვი და ორი ქალი დაიღუპა.

"ჩემი სამი პატარა დისშვილი ქუჩაში ვიპოვეთ. ამბობენ, - "ცეცხლის შეწყვეტა“ და ა.შ. რა დააშავეს იმ ბავშვებმა? ჩვენ რა გავაკეთეთ?!“ - თქვა სამერ ალ-ატბაშმა, გარდაცვლილი ბავშვების ბიძამ.