შეძლებენ აშშ და ირანი შეთანხმებას? - მხარეები მოლაპარაკებებზე საუბრობენ: "ირანი ჩვენთან სერიოზულ მოლაპარაკებებს აწარმოებს"

"ირანი ჩვენთან სერიოზულ მოლაპარაკებებს აწარმოებს", - ამის შესახებ აშშ-ის პრეზიდენტმა, დონალდ ტრამპმა ჟურნალისტებს Air Force One-ის ბორტზე განუცხადა.

• "ჩვენთან მოლაპარაკებებს აწარმოებენ. ისინი სერიოზულ მოლაპარაკებებს აწარმოებენ“, - განაცხადა ტრამპმა.

მისი თქმით, შეთანხმება მისაღები იქნება, თუ ირანი ბირთვული იარაღის შექმნაზე უარს იტყვის.

"შეიძლება შეთანხმებას მიაღწიონ, რომელიც მისაღები იქნება ბირთვული იარაღის გარეშე. მათ ეს უნდა გააკეთონ, მაგრამ არ ვიცი, გააკეთებენ თუ არა ამას“, - აღნიშნა აშშ-ის პრეზიდენტმა.

ამასთან, კითხვაზე, ირანის წინააღმდეგ პოტენციური დარტყმების შესახებ საბოლოო გადაწყვეტილება მიიღო თუ არა, ტრამპმა უპასუხა, რომ "ამის შესახებ საუბარი არ შეუძლია“.

"ბუნებრივია, რომ ამის შესახებ ვერ გეტყვით, მაგრამ იმ მიმართულებით ძალიან ძლიერი გემები მიემართებიან“, - განაცხადა აშშ-ის პრეზიდენტმა.

ამ თემაზე კომენტარი გააკეთეს ირანშიც. ირანის ეროვნული უშიშროების უზენაესი საბჭოს თავმჯდომარე, ალი ლარიჯანი აცხადებს, რომ აშშ-სთან მოლაპარაკებების დაწყების მიმართულებით პროგრესი შეინიშნება.

"მედიის მიერ ომის შესახებ ხელოვნურად შექმნილი აჟიოტაჟის მიუხედავად, მოლაპარაკებებისთვის სტრუქტურული მზადება პროგრესირებს“, - განაცხადა ლარიჯანმა.

• ალი ლარიჯანი თეირანში კატარის პრემიერ-მინისტრს, შეიხ მუჰამედ ბინ აბდულრაჰმან ალ თანის შეხვდა.

კატარის პრემიერ-მინისტრის ადმინისტრაციის განცხადებით, მხარეებმა "რეგიონში არსებული დაძაბულობის დეესკალაციისკენ მიმართული მიმდინარე ძალისხმევა განიხილეს“.