სომხეთის პრემიერის პრესსამსახური უარყოფს, რომ ნიკოლ ფაშინიანმა ერევანში ლგბტ აღლუმის ჩატარება დაამტკიცა
რიგმა მედიებმა გაავრცელეს ინფორმაცია, რომ სომხეთის პრემიერ-მინისტრმა ერევანში ლგბტ საზოგადოების აღლუმის ჩატარება დაამტკიცა. აღნიშნულს პრემიერ-მინისტრის პრესსპიკერი, ნაზელი ბაღდასარიანი ოფიციალურად გამოეხმაურა.
- მისი თქმით, “მედიასა და სოციალურ მედიაში გავრცელებული განცხადებები, რომ სომხეთის პრემიერ-მინისტრმა ნიკოლ ფაშინიანმა 7 აპრილს, ერევანში ლგბტ საზოგადოების აღლუმის ჩატარება დაამტკიცა, სინამდვილეს არ შეესაბამება".
"გავრცელებულ მასალას უცხოური ინფორმაციული მანიპულირებისა და ჩარევის (FIMI) ტიპური მახასიათებლები აქვს და ჰიბრიდული გავლენის კამპანიების კომპონენტია. პუბლიკაციის ავტორმა, ოკაი დეპრემმა, ადრე არაერთხელ გაავრცელა ცრუ და მანიპულაციური ინფორმაცია სომხეთის რესპუბლიკის სახელმწიფო ინსტიტუტების შესახებ, რაც დოკუმენტირებულია როგორც სომხური, ასევე საერთაშორისო ექსპერტული წრეების მიერ.
ასეთი პუბლიკაციების მიზანია საზოგადოების პოლარიზაცია და სახელმწიფო ინსტიტუტების მიმართ ნდობის შესუსტება საარჩევნო პროცესის წინა პერიოდში“, - აღნიშნა ბაღდასარიანმა.
- პოსტში პრესსპიკერმა გააზიარა CGTN Turk-ის და აზერბაიჯანული ვებსაიტ Haqqin.az-ის "სქრინშოტები“. CGTN-ის სტატიაში ავტორი, ოკაი დეპრემი, აღნიშნავს, რომ "ერთ-ერთი მეზობელი ქვეყანა, სადაც ლგბტ პირებმა ბოლო წლებში სწრაფად დაიწყეს ორგანიზება, თავდაპირველად ლეგალიზაციის მოთხოვნით და შემდეგ ქუჩაში გასვლისთვის მზადებით, სომხეთია.