გოგონამ, რომელიც თავს ბულინგის მსხვერპლად მიიჩნევდა, თანაკლასელების დაწვა სცადა - უმძიმესი ამბის დეტალები: რა მოხდა რუსეთის სკოლაში
რუსეთში, მერვე კლასის მოსწავლემ, რომელიც თავს ბულინგის მსხვერპლად მიიჩნევდა, კლასში ხანძარი გააჩინა. შემთხვევა 3 თებერვალს კრასნოიარსკის №153 სკოლაში მოხდა. 14 წლის გოგონამ ბენზინით სავსე ბოთლი ჯერ სკოლის საპირფარეშო შეაგდო, სადაც ხანძარი გაჩნდა, შემდეგ კი საკლასო ოთახში.
- შსს-ს ადგილობრივი სამმართველოს ცნობით, მოსწავლე ცეცხლწაკიდებული ოთახის გასასვლელში იდგა და ჩაქუჩის მსგავს საგანს ურტყამდა თავში მათ, ვინც საკლასო ოთახის დატოვებას ცდილობდა. ხანძრის შედეგად სხეულის სხვადასხვა ხარისხის დაზიანებები მიიღეს, როგორც მოსწავლეებმა, ასევე მასწავლებელმაც.
ძალოვან სტრუქტურებთან დაახლოებული Telegram-არხების მიხედვით, საკლასო ოთახში გაჩენილი ხანძრისას, ცეცხლი მოედო კედლებს, ჟალუზებს და მერხების პირველ რიგს. წინასწარი მონაცემებით, ინციდენტის შედეგად სულ სკოლის ხუთი მოსწავლე დაშავდა, ყველა მათგანი ჰოსპიტალიზებულია. ერთ ბავშვს სხეულის 40%-იანი დამწვრობა აქვს, ორ კი — 15–20%. კიდევ ორი ბავშვი საავადმყოფოში გადაიყვანეს ჩაქუჩით მიყენებული თავის ტვინის ტრავმებით.
ტელგრამ არხებში ასევე ვრცელდება ინფორმაცია იმის შესახებ, რომ გოგონამ სკოლის ჩატში ხანძრის გაჩენა დააანონსა და გამოკითხვაც კი ჩაატარა, თუმცა მუქარა სერიოზულად არავინ მიიღო.
ტელეგრამ არხ Mash-ის ინფორმაციით, გოგონას კანონსაწინააღმდეგო ქმედების მიზეზი თანაკლასელების მხრიდან ბულინგი გახდა. მას კლასელები დასცინოდნენ და გარე სამყაროსგან მოწყვეტილ, საკუთარ თავში ჩაკეტილ ადამიანად მიიჩნევდნენ და შესაბამის მეტსახელს ეძახდნენ .
"ნოვაია გაზეტას" ცნობით, მოსწავლე დააკავეს და იგი დედასთან ერთად გაკითხვაზე გადაიყვანეს.