"დაურეკეთ დედებს უმიზეზოდ" - სოსო პავლიაშვილი ყოფილ მეუღლეს, ნინო უჩანეიშვილს დაბადების დღეს საჯაროდ ულოცავს: რას წერს მომღერალი

მომღერალი სოსო პავლიაშვილი სოციალურ ქსელში ემოციურ პოსტს აქვეყნებს. ამჯერად მომღერლის მიმართვა მის პირველ მეუღლეს, ნინო უჩანეიშვილსა და მათ საერთო შვილს, ლევან პავლიაშვილს ეხება.

• როგორც ირკვევა, ნინო უჩანეიშვილი დაბადების დღეს აღნიშნავს, რასთან დაკავშირებითაც მათმა ვაჟმა, ლევანმა დედას ახალი სიმღერა „Мама“ მიუძღვნა. მომღერალმა შვილის ნამუშევარი საკუთარ გვერდზე გააზიარა და გამომწერებს მიმართა:

"დღეს ჩვენი ნინოს, ლევანის დედის დაბადების დღეა. ამ სასიხარულო მიზეზით, ჩვენმა შვილმა ჩაწერა სიმღერა „დედა“. მოდით, დღეს ყოველგვარი მიზეზის გარეშე დავურეკოთ ჩვენს დედიკოებს და ვუთხრათ, როგორ ძლიერ გვიყვარს ისინი. ასევე შეგიძლიათ გაუგზავნოთ სიმღერა „დედა“, რომელშიც ზედმეტი სიტყვები არ არის“ - წერს სოსო პავლიაშვილი.

ცნობილია, რომ სოსო პავლიაშვილსა და ნინო უჩანეიშვილს, დანგრეული ოჯახის მიუხედავად, სამაგალითო მეგობრობა და თბილი ურთიერთობა აკავშირებთ. ნინო ხშირად სტუმრობს მომღერლის ახალ ოჯახს მოსკოვში და სოსოს ამჟამინდელ მეუღლესთან, ირინა პატლახთანაც მეგობრობს.

პავლიაშვილის უფროსი ვაჟი, ლევანი, მამის გზას აგრძელებს და მუსიკალურ სფეროში აქტიურადაა ჩართული.

წაიკითხეთ ასევე:

• "ეს დიდი ცოდვა იყო, რისთვისაც ბევრჯერ გადავიხადე" - აღიარება დარბაზში მყოფი ცოლ-შვილის წინაშე: სოსო პავლიაშვილი ღალატსა და სინანულზე