ივან ურგანტის ქართველი ცოლის დრამა: "მამამ 19 წლის ასაკში ბიზნესის გამო გაათხოვა, 10 წლის შემდეგ კი ქმარს შვილებთან ერთად გაექცა"
ტელეწამყვან ივან ურგანტის ცხოვრება 2022 წლის თებერვალში ორად გაიყო, როდესაც მისი შოუ "ვერჩერნი ურგანტი" ეთერიდან გაქრა. ამ რთულ პერიოდში მის გვერდით უცვლელად რჩება მეუღლე, ნატალია კიკნაძე. თუმცა, ცოტამ თუ იცის, რა გზა გაიარა ნატალიამ ურგანტთან ბედნიერების პოვნამდე.
იძულებითი ქორწინება და ოქროს გალია
ნატალია კიკნაძე ლენინგრადში ცნობილი იუველირის, ავთანდილ კიკნაძის ოჯახში დაიბადა. მამა გავლენიანი პირი იყო და შვილის მომავალიც წინასწარ ჰქონდა დაგეგმილი. 19 წლის ნატალია მამის ბრძანებით ცოლად გაჰყვა გავლენიანი ქართველი ბიზნესმენის შვილს, თეიმურაზ კუტალიას. ეს ქორწინება ორ ოჯახს შორის ბიზნეს-კავშირების განმტკიცებას ემსახურებოდა.
მიუხედავად იმისა, რომ წყვილს ორი შვილი - ნიკო და ერიკა შეეძინათ და ფუფუნებაში ცხოვრობდნენ, ნატალია თავს ბედნიერად არ გრძნობდა. მას და მის მეუღლეს რადიკალურად განსხვავებული შეხედულებები ჰქონდათ ცხოვრებაზე.
გაქცევა და დაკარგული შვილი
10-წლიანი თანაცხოვრების შემდეგ, ნატალიამ გაქცევა გადაწყვიტა. ამ ნაბიჯმა მამამისის დიდი რისხვა გამოიწვია - ავთანდილ კიკნაძე შვილის საქციელს არ ამართლებდა. კონფლიქტის გამო ნატალია იძულებული გახდა, ვაჟი - ნიკო ყოფილ ქმართან დაეტოვებინა, ქალიშვილი ერიკა კი მოსკოვში თან წაიყვანა.
სკოლის მერხიდან დაწყებული სიყვარული
ნატალიამ და ივანმა ერთმანეთი სანკტ-პეტერბურგის ელიტარულ გიმნაზიაში გაიცნეს, სადაც ერთ მერხთან ისხდნენ. ამბობენ, რომ ივანს ნატალია სკოლის ასაკიდანვე უყვარდა და გამოსაშვებ საღამოზე ცოლობაც კი სთხოვა, თუმცა მაშინ გოგონამ ეს ხუმრობად მიიღო.
წლების შემდეგ, სანკტ-პეტერბურგში შემთხვევითი შეხვედრა საბედისწერო აღმოჩნდა. მათ მალევე ფარულად იქორწინეს. ოჯახის წევრებმა და თაყვანისმცემლებმა მათი ქორწინების შესახებ მხოლოდ ორი წლის შემდეგ შეიტყვეს.
როგორ ცხოვრობენ დღეს?
დღეს წყვილს ორი საერთო ქალიშვილი ჰყავს - ნინა და ვალერია. ივანს ნატალიას უფროს შვილთან, ერიკასთანაც ყოველთვის შესანიშნავი ურთიერთობა ჰქონდა და მას საკუთარი შვილივით ზრდიდა. რაც შეეხება ნიკოს, ის მუსიკოსი და კლიპების პროდიუსერია და დედასთან და დებთან თბილი ურთიერთობა აქვს.
ნატალია კიკნაძე ამჟამად რესტორნების ბიზნესით არის დაკავებული და ცდილობს, ოჯახური ცხოვრება პრესისგან მაქსიმალურად დაფარული ჰქონდეს.
წაიკითხეთ ასევე: