NASA მარსზე იშვიათ ექსპერიმენტს ატარებს - როგორ აპირებენ დაადგინონ, არის თუ არა პლანეტაზე სიცოცხლის ნიშნები
NASA-ს როვერმა მარსის ნიმუშის გასაანალიზებლად სპეციალური ქიმიური ნივთიერების წვეთი გამოიყენა. ნიმუში შესაძლოა შეიცავდეს ორგანულ ნივთიერებებს — მოლეკულების იმ ტიპს, რომლებიც სიცოცხლისთვის მნიშვნელოვანია.
მეცნიერებმა Curiosity-ს როვერით იშვიათი ტიპის ექსპერიმენტის დაგეგმვა დაიწყეს.
რობოტმა მსგავსი ექსპერიმენტი მარსზე, 13 წლის განმავლობაში ყოფნის დროს, მხოლოდ ერთხელ ჩაატარა. ექსპერიმენტის დროს იყენებენ სპეციალურ სითხეს, რომელიც შედგება ტეტრამეთილამონიუმის ჰიდროქსიდის (TMAH) და მეთანოლისგან. მისი დახმარებით შესაძლებელი გახდება ნახშირბადის შემცველი ნაერთების აღმოჩენა — მოლეკულების, რომლებიც შესაძლოა სიცოცხლეს უკავშირდებოდნენ.
Curiosity-ის ბორტზე არსებულ ლაბორატორიას მთელი მისიის განმავლობაში ამ ქიმიური ნივთიერების მხოლოდ ორი პატარა კონტეინერი ჰქონდა, აქედან ერთი თითქმის ექვსი წლის წინ გამოიყენეს.
- ტესტირების ეს ძლიერი მეთოდი მეცნიერებს საშუალებას აძლევს, უფრო დეტალურად შეისწავლონ სიცოცხლის ნიშნები, რომლებიც სტანდარტულ ტესტებში შეიძლება გამორჩენოდათ. ამ მოლეკულების აღმოჩენა მკვლევრებს ეხმარება გაიგონ, ჰქონდა თუ არა მარსს ოდესღაც სიცოცხლისთვის საჭირო პირობები.
მეცნიერებმა მარსზე ორგანული ნივთიერებები ადრეც აღმოაჩინეს, თუმცა ჯერ კიდევ მუშაობენ იმის გასაგებად, რას ნიშნავს ეს აღმოჩენები. სექტემბერში NASA-მ განაცხადა, რომ Perseverance-ის როვერის მიერ შეგროვებული ნიმუში შეიცავს ნამარხ მასალას, რომელიც შესაძლოა უძველეს მიკროორგანიზმებს ეკუთვნოდა.
წაიკითხეთ ასევე: