რამზან კადიროვის თქმით, ინფორმაცია ადამ კადიროვის ავარიაში მოყოლის შესახებ "ხელოვნური ინტელექტით შექმნილი ფეიკია" - "ეს საინფორმაციო ნაგავია"
ჩეჩნეთის ლიდერმა, რამზან კადიროვმა, თითქმის ერთთვიანი დუმილის შემდეგ, პირველად გააკეთა კომენტარი ინფორმაციაზე, რომლის მიხედვით, მისი შვილი, ადამ კადიროვი ავტოავარიაში მოჰყვა, რა დროსაც მძიმედ დაშავდა.
კადიროვმა გავრცელებულ ინფორმაციას "საინფორმაციო ნაგავი“ უწოდა და მომხდარი "ტექნოლოგიურ მანიპულაციებს" დააბრალა.
- ჩეჩნეთის პროკურორთან, არსან ადაევთან შეხვედრისას, კადიროვმა განაცხადა, რომ თანამედროვე ტექნოლოგიები დეზინფორმაციის გავრცელებას აადვილებს:
"ხელოვნური ინტელექტის მეშვეობით დღეს ნებისმიერი ადამიანის მოტყუებაა შესაძლებელი. ქვეყანაში 128 ათასი ავარია მოხდა, მაგრამ ეს არავის ადარდებს. ჩემი შვილის შესახებ გავრცელებული ჭორი კი მსოფლიო ამბებში ნომერ პირველ თემად იქცა“, - ამბობს რამზან კადიროვი.
კადიროვის თქმით, ჩეჩნეთი აძლიერებს ბრძოლას კიბერდანაშაულსა და "ფეიკ-ნიუსებთან“, რომლებიც რეგიონის წინააღმდეგ არის მიმართული.
ცნობისთვის, ინფორმაცია 18 წლის ადამ კადიროვის მძიმე მდგომარეობის შესახებ პირველად 16 იანვარს გავრცელდა.
- მედია იტყობინებოდა, რომ ადამ კადიროვი გროზნოში მძიმე ავარიაში მოჰყვა და მისი მდგომარეობა კრიტიკული იყო.
- 17 იანვარს გავრცელდა ცნობა, რომ მოსკოვში, ვნუკოვოს აეროპორტში სპეციალური სანიტარული თვითმფრინავი დაეშვა, რომელსაც მალევე რამზან კადიროვის პირადი ბორტიც მიჰყვა. ვარაუდობდნენ, რომ უმცროსი კადიროვი სამკურნალოდ რუსეთის დედაქალაქში გადაიყვანეს.
ადამ კადიროვი რამზან კადიროვის ერთ-ერთი ყველაზე გავლენიანი შვილია. მიუხედავად ახალგაზრდა ასაკისა, მას ჩეჩნეთის რესპუბლიკის უშიშროების საბჭოს მდივნის პოსტი უკავია.
მისი სახელი მსოფლიო მედიის ყურადღების ცენტრში 2023 წელსაც მოექცა, როდესაც გავრცელდა ვიდეო, სადაც ჩანდა, რომ წინასწარი დაკავების იზოლატორში ყურანის დაწვაში ბრალდებულ ნიკიტა ჟურაველს ფიზიკურად უსწორდებოდა. ამ ფაქტის შემდეგ ადამს "ჩეჩნეთის გმირის“ წოდება მიანიჭეს და არაერთი სახელმწიფო ჯილდო გადასცეს.
დამოუკიდებელი მედიასაშუალებები აღნიშნავენ, რომ ბოლო კვირების განმავლობაში ჩეჩნური სამთავრობო არხები ადამ კადიროვის მონაწილეობით ძველ კადრებს ავრცელებენ, რათა შექმნან ილუზია, თითქოს ის თავს კარგად გრძნობს და მუშაობას ჩვეულ რეჟიმში აგრძელებს.
წაიკითხეთ ასევე: