პოლონეთში საქართველოს 4 მოქალაქე დააკავეს - რას წერს ადგილობრივი მედია დაკავების მიზეზებზე?
ვარშავის პოლიციისა და კორუფციის წინააღმდეგ ბრძოლის ბიუროს კონტრტერორისტული ოფიცრების ერთობლივი ოპერაციის შედეგად, საქართველოს ოთხი მოქალაქე დააკავეს. ამის შესახებ ინფორმაციას პოლონური მედია აქვეყნებს.
მათივე ცნობით, საქართველოს მოქალაქეები სასაზღვრო დაცვის მხარდაჭერით, ლოძის რეგიონის ქალაქ ვიელუნში დააკავეს.
- დაკავებულთაგან ერთ-ერთი ლიეტუვის სასამართლო სისტემის მიერ გაცემული ევროპული საგამოძიებო ორდერის საფუძველზე იძებნებოდა, თუმცა რის გამო იყო ძებნილი - უცნობია. მას ლიეტუვის მართლმსაჯულებას გადასცემენ
რაც შეეხება დანარჩენ სამ დაკავებულს, როგორც მედია წერს, ისინი უკანონოდ იმყოფებოდნენ პოლონეთის ტერიტორიაზე და პოლონეთიდან მათი გაძევების შესახებ გადაწყვეტილება მალე იქნება მიღებული.
თუმცა დაკავების ოფიციალური მიზეზი ცნობილი არ არის, ასევე უცნობია, რატომ იყო ჩართული ოპერაციაში კონტრტერორისტული დანაყოფი
- პოლონური მედია წერს, რომ პოლიცია აგრძელებს შემოწმებას, თუ რამდენად კანონიერად იმყოფებიან უცხოელები მათი ქვეყნის ტერიტორიაზე.