გვარდიოლა - ფეხბურთის ჩე გევერა, კატალონიელი კალატოზის შვილი, რომელმაც ფეხბურთი შეცვალა და პოლიტიკაზეც ხმამაღლა საუბრობს: "ერთმანეთს ვკლავთ და რისთვის?"

მნიშვნელობა არ აქვს გიყვართ, თუ გეზიზღებათ - მის განსაკუთრებულ ნიჭს ყველა აფასებთ. პეპ გვარდიოლას რევოლუციური იდეების გამო ფეხბურთის ჩე გევარას უწოდებენ და ის მართლაც არის მწვრთნელი, რომელმაც ფეხბურთი შეცვალა და სპორტის ეს სახეობა განვითარების ახალ საფეხურზე აიყვანა.

• პეპი ბარსელონიდან 70კმ-ში, პატარა ქალაქ სანტპედორში დაიბადა, მონსერატის კლდოვანი კონტურების ჩრდილში

ის ოჯახის ოთხი შვილიდან მესამე იყო. მამა კალატოზი - ვალენტი გვარდიოლა, ხოლო დედა დოლორეს სალაა. ოჯახი ესპანეთის მუშათა კლასს წარმოადგენდა. დოლორესი და ვალენტი შვილებს ოჯახის ტრადიციული პრინციპებით ზრდიდნენ.

აი, რას ამბობს პეპ გვარდიოლას შესახებ მისი ახლო მეგობარი, მწერალი და კინორეჟისორი დავიდ ტრუება:

"არავის მიუქცევია ყურადღება იმ ფაქტისთვის, რომ გვარდიოლა კალატოზის შვილია.

პეპისთვის მამამისი პატიოსნებისა და შრომისმოყვარეობის მაგალითია. ოჯახმა მას ძველი ღირებულებები ჩაუნერგა, ღირებულებები იმ დროიდან, როდესაც მშობლებს არ ჰქონდათ ფული, ან ქონება, რომ შვილებისთვის გადაეცათ.

როდესაც საქმე გვარდიოლას შეფასებას ეხება, უნდა გახსოვდეთ, რომ მისი ელეგანტური კოსტიუმის, ქიშმირის სვიტერისა და ჰალსტუხის ქვეშ, მშენებლის შვილი იმალება. ძვირადღირებული იტალიური ფეხსაცმლის შიგნით ესპადრელებში გამოწყობილი ბიჭის გულია დამალული“.

• გვარდიოლას შესახებ წარმოდგენაც არ გექნებათ, თუ არაფერი იცით "ლა მასიას“ ("ბარსელონას" აკადემია) შესახებ. 1984 წლიდან, დაახლოებით 6 წლის განმავლობაში, ეს ადგილი პეპის საშინაო არენა იყო.

"ცხოვრების საუკეთესო წლები "ლა მასიაში" გავატარე. ეს იყო დრო, როცა კონცენტრირებული ვიყავი მთავარ ოცნებაზე - მეთამაშა "ბარსას" მთავარ გუნდში. "ბარსელონასა" და ნიდერლანდების ნაკრების ლეგენდა, იოჰან კრუიფი გვარდიოლას მენტორი გახდა, ის იყო ადამიანი, რომელსაც რეგულარულად ხვდებოდა მწვრთნელობამდე და მას შემდეგ.

კრუიფი ერთადერთი ადამიანი არ არის, რომელმაც პეპზე გავლენა მოახდინა. კიდევ ერთი ასეთი ადამიანი არგენტინელი, "ელ კოკო" (გიჟი),. მარსელო ბიელსაა.

ბიელსას, ჩილესა და არგენტინის ნაკრებების ყოფილ მწვრთნელს, ბევრი ტიტული არ აქვს მოგებული, თუმცა გვარდიოლა ამბობს, რომ ეს მისთვის არაფერს ნიშნავს და რომ მარსელოს გენიალური აზრები აქვს.

"კი, ჩვენ, მწვრთნელები იმით ვფასდებით თუ რამდენი ტიტული მოვიგეთ, თუმცა ჩემთვის მარსელოს ტიტულები ნაკლებ მნიშვნელოვანია. მნიშვნელოვანია ის, თუ როგორ მოახდინა გავლენა ფეხბურთსა და ფეხბურთელებზე. სწორედ ამიტომ, ჩემთვის, ის მსოფლიოში საუკეთესო მწვრთნელია“, - ამბობს პეპი.

ბიელსამ არგენტინის ვილაში 11-საათიანი საუბრის დროს გვარდიოლას უთხრა, რომ ფეხბურთი იდეაა და მწვრთნელმა მისთვის ბრძოლა, მოთამაშეების გაუმჯობესება არასდროს უნდა შეწყვიტოს, ფეხბურთისადმი ვნება არ უნდა დაკარგოს.

• ერთხელ, უკვე წარმატებულ მწვრთნელს, პეპ გუარდიოლას, "ლა მასიაში" სიტყვით გამოსვლა როცა სთხოვეს, მან თქვა:

"ყოველ ღამით, როცა დასაძინებლად წახვალთ, საკუთარ თავს ჰკითხეთ, ზუსტად იმ მომენტში თუ ადგებოდით, ბურთს აიღებდით და თამაშს დაიწყებდით და თუ ამ კითხვაზე ოდესმე თქვენი პასუხი იქნება "არა", ზუსტად ეს იქნება ისეთი დღე, როცა სხვა პროფესიის ძებნა უნდა დაიწყოთ“.

გვარდიოლა 13 წლის ასაკში შეუერთდა "ბარსელონას". საინტერესოა, რომ პეპმა თვითონ შეარჩია პოზიცია, სადაც ითამაშებდა. "ბარსელონაs" იმდროინდელ მწვრთნელს, იოჰან კრუიფს უთხრა, რომ მარჯვენა ნახევარმცველად ითამაშებდა.

პეპი იყო "ბარსას" იმ "ოცნების გუნდის“ წევრი, რომელმაც 1992 წელს ევროპის თასი მოიგო.

გვარდიოლა თამაშობდა ბრეშაში, რომაში, ალ-აჰლიში და დორადოსში, სანამ 2006 წელს ფეხბურთელის კარიერას დაასრულებდა. მან ასევე 47 მატჩი ჩაატარა ესპანეთის ნაკრების შემადგენლობაში და ხუთი გოლი გაიტანა.

ამის შემდეგ იწყება უკვე მისი სამწვრთნელო კარიერა. ყველაფერი "ბარსელონას" ბ გუნდის მწვრთნელობიდან დაიწყო.

• საუკეთესო შედეგს აღწევს ის, ვინც ყველაზე მეტს შრომობს - ჰოდა, ამ მხრივ არც პეპია გამონაკლისი. ის ბევრს შრომობს წარმატებისთვის და ფეხბურთელებისგანაც იმავეს მოითხოვს.

"ბარსელონას" ყოფილი ფეხბურთელი, ეიდორ გუდიონსენი იხსენებს, რომ ერთხელ მივიდა გვარდიოლასთან და ჰკითხა, თუ რა სჭირდებოდა მისგან იმისთვის, რომ მეტი სათამაშო დრო მიეღო, პეპის პასუხი კი ასეთი იყო - "შენი ცხოვრება“.

გვარდიოლას ასისტენტი სიტიში და მისი მეგობარი მანუელ ესტიარტე სიცილით ჰყვება, რომ ის ხშირად ესაუბრება პეპს მაშინ, როცა ზუსტად იცის, რომ გვარდიოლა სინამდვილეში არ უსმენს და მთლიანად ჩაფლულია "რაღაცის ანალიზში“.

• "მისი სხეული აქ არის, თქვენ მას ხედავთ, მაგრამ გონება კილომეტრებით შორსაა“, - ამბობს ესტიარტე.

ის ღრუბელივით ისრუტავს ცოდნას და მზად არის ისწავლოს ყველასგან. პრინციპები რაც მან ისწავლა და დროთა განმავლობაში განავითარა, მკაცრად ურყევია. სხვების მოსმენით შეიძლება რაღაცები დაამატოს, მაგრამ საფუძველი უცვლელია.

• მისი ფილოსოფია ასეთია - ის, რაც გუნდს ერთ მთლიანობად აქცევს და რაც ამ სპორტს სახალისოს ხდის, არის ბურთი. ფეხბურთელები ფეხბურთელები იმიტომ გახდნენ, რომ ბურთით ეთამაშათ, ამიტომ მიეცით მათ ბურთი რაც შეიძლება ხშირად და მოდით ავაგოთ ყველაფერი ამ იდეის გარშემო, რომ ბურთი სულ ჩვენთან იყოს, მაგრამ თან გვახსოვდეს, რომ ბურთი "წვავს“ - როგორც კი შეგიძლია, გადაეცი თანაგუნდელს, ითამაშე სწრაფად, ითამაშე მარტივად და როცა ბურთს დაკარგავ, რაც შეიძლება მალე დაიბრუნე, რადგან თუ ბურთს არ ფლობ, "ეს უნდა გტკიოდეს".

თუ ამ რწმენას შევურევთ გვარდიოლას აკვიატებულ სურვილს, ყოველთვის იპოვოს პრობლემების გადაწყვეტის გზა, მივიღებთ მწვრთნელს, რომელმაც გამარჯვების ახალი გზა შეიმუშავა - არა საუკეთესო, არამედ განსხვავებული.

პეპმა ბარსასთან ერთად 14 თასი მოიგო, ბაიერნთან ერთად 7 თასი, ხოლო მანჩესტერ სიტისთან ერთად - 18.

ფეხბურთის სპეციალისტები ერთხმად აღიარებენ, რომ პეპმა ფეხბურთი შეცვალა.

"პეპი ფეხბურთის ჩე გევარაა. მისი იდეა ურყევია. არასდროს შეცვლის ამას - მას სურს ლამაზი თამაში, სივრცის ფლობა, დროის მართვა, სურს, რომ ყოველთვის ერთი ნაბიჯით წინ იყოს“, - ამბობს არგენტინის ყოფილი მწვრთნელი სესარ ლუის მენოტი.

• გვარდიოლას ასეთი გატაცება ფეხბურთის მიმართ ზოგჯერ დანაშაულისა და სინანულის გრძნობას უჩენს იმ ადამიანების მიმართ, ვინც მასთან ყველაზე ახლოს არიან - დანაშაულის განცდა ოჯახის წევრების მიმართ.

ერთხელ ქალიშვილის სკოლის კონცერტი გამოტოვა, დაავიწყდა - იმ დროს "ბარსელონას" მომავალი მეტოქის, "ხეტაფეს" მატჩების ჩანაწერებს უყურებდა. მეგობრები იხსენებენ, როგორ განიცდიდა ამის გამო.

"ბარსელონიდან" წასვლის შემდეგ კარიერული ტაიმაუტის აღება ერთგვარი მცდელობა ჰქონდა, რომ ოჯახისთვის დრო დაეთმო და დანაკლისი აენაზღაურებინა, თუმცა ფეხბურთის გარეშე დიდხანს ვერ გაძლო და სულ რაღაც სამ თვეში "ბაიერნთან“ დაიწყო მოლაპარაკებები.

პეპი დაქორწინებული იყო კრისტინა სერაზე, თუმცა 30-წლიანი ურთიერთობის შემდეგ, წყვილმა დაშორდება გადაწყვიტა. წყვილს სამი შვილი ჰყავს - მარია, მარიუსი და ვალენტინა.

სამწვრთნელო კარიერის ადრეულ წლებში ნებისმიერი მატჩისთვის ერთნაირად ემზადებოდა. საათობით უყურებდა მეტოქის ვიდეოებს, რათა სუსტი მხარეები დაედგინა. შემდეგ ფეხბურთელებს ამონარიდებს აჩვენებდა და ამის შემდეგ ატარებდა ვარჯიშს, რომელიც კონკრეტულ თამაშზე იყო ორიენტირებული

პაბლო საბალეტა, რომელიც "სიტიში" მის გუნდში თამაშობდა, იხსენებს.

"მან ძალიან ემოციური ვიდეო გვაჩვენა, კინაღამ ვიტირე, ზოგიერთმა ფეხბურთელმა ტირილი დაიწყო. ვიდეოში გასაჭირში მყოფი ადამიანები იყო ნაჩვენები. პეპმა გვითხრა: მინდა, ყველამ დაინახოთ, რამდენად იღბლიანები ხართ, რომ ამას აკეთებთ. ჩვენ გვაქვს საუკეთესო შენობა, საუკეთესო სავარჯიშო ბაზა, ვჩერდებით საუკეთესო სასტუმროებში“.

პეპ გუარდიოლა და პოლიტიკა

1992 წელს, როდესაც კატალონიის პარლამენტის შენობის აივანზე "ბარსას" მიერ მოგებული ევროპის თასი აღმართა, მან ასეთი სიტყვები თქვა "Ciutadans de Catalunya, ja la tenim aqui“ ("კატალონიის მოქალაქენო, ბოლოს და ბოლოს ის აქ გვაქვს“).

ეს კატალონიის ყოფილი ლიდერის, ჟოზეპ ტარადელიასის სიტყვებია. ტარადელიასი 1939 წლიდან საფრანგეთში, ემიგრაციაში ცხოვრობდა, თუმცა 1977 წლის 23 ოქტომბერს, ესპანელი დიქტატორის, გენერალ ფრანკოს გარდაცვალებიდან ორი წლის შემდეგ დაბრუნდა და იმავე ადგილიდან, სადაც მოგვიანებით გვარდიოლამ თასი აღმართა, თქვა - კატალონიის მოქალაქენო, ბოლოს და ბოლოს დავბრუნდი.

გვარდიოლა კატალონიის დამოუკიდებლობას უჭერს მხარს, თუმცა მისი პოლიტიკური შეხედულებები შორსაა ექსტრემიზმისა და რადიკალიზმისგან, ასევე გამორიცხავს, რომ მომავალში პოლიტიკოსი იყოს. ის ადრე მოითხოვდა დაკავებული კატალონიელი პოლიტიკოსების გათავისუფლებას.

• "მწვრთნელობამდე მე ადამიანი ვარ. ოთხი ადამიანი ციხეშია, ასევე ქვეყნის ფარგლებს გარეთ არიან ადამიანები, რომლებსაც დააპატიმრებენ თუკი დაბრუნდებიან. მათ დააპატიმრებენ აჯანყებისა და სეპარატიზმის ბრალდებით“, - თქვა პეპმა.

რამდენიმე დღის წინ პეპ გვარდიოლა გლობალურ მოვლენებს შეეხო პრესკონფერენციაზე.

"ჩვენ ერთმანეთს ვკლავთ და რისთვის?" - ასე მიმართა მან ჟურნალისტებს, რომლებიც საპრესკონფერენციო დარბაზში "მანჩესტერ სიტის" არც ისე დამაჯერებელი თამაშის შესახებ სვამდნენ კითხვებს.

"მე ყოველთვის თქვენს გვერდით ვიქნები. ყოველთვის. ათასობით უდანაშაულო ადამიანის მკვლელობა, ეს მტკივა

.ვერ ვხვდები, როგორ შეიძლება ვინმე დარჩეს გულგრილი, როცა ყოველდღე ვხედავთ ამ კადრებს - ამ მამებს, ამ დედებს, ამ ბავშვებს, ამ დამსხვრეულ ცხოვრებებს და ოდნავი თანაგრძნობაც არ გაგაჩნდეს.

მაპატიეთ, მაგრამ მე არ შემიძლია. არის ვინმე, ვინც ამ კადრებს ხედავს და გულგრილი რჩება? არ ვსაუბრობ იმაზე, ვინ არის მართალი და ვინ არა. ადამიანებს ისტორიაში არასდროს გვქონია ინფორმაცია ისე მკაფიოდ და თვალნათლივ წარმოდგენილი, როგორც დღეს: რაც ხდება პალესტინაში, რაც მოხდა უკრაინაში, რუსეთში, მსოფლიოს ნებისმიერ კუთხეში, სუდანში - ყველგან.

რა ხდება ჩვენს თვალწინ? გინდათ ამის დანახვა? ეს ჩვენი პრობლემებია, როგორც ადამიანების", - ამბობს პეპი.