გაუჩინარებული მოზარდი დები სექტის წევრები აღმოჩნდნენ - ვინ არის "რუსი თვითმარქვია მეფე", რომელის ბავშვებს ციხიდან მართავს
სანქტ-პეტერბურგში ორი დის - 11 წლის ირინასა და 18 წლის მარინას გაუჩინარების საქმემ, რომელიც თავიდან ჩვეულებრივ ძებნად ითვლებოდა, შემზარავი ელფერი მიიღო. ძიების მეოთხე დღეს გაირკვა, რომ გოგონები არა უბრალოდ დაიკარგნენ, არამედ დედასთან ერთად საშიში რელიგიური სექტის, "მეფის იმპერიის" ბუნაგში გადაიმალნენ. მამამ, რომელიც შვილების ოთახში შევიდა, იქ მართლმადიდებლური ხატების ნაცვლად, კედლებზე გაკრული პორტრეტები იპოვა, საიდანაც მათ "ახალი ღმერთი" - ოთხჯერ ნასამართლევი რეციდივისტი უმზერდა.
ვინ არის "მეფე ზოსიმა" – ლიდერი, რომელიც ციხიდან მართავს ადამიანების ბედს
სექტის სათავეში დგას ვინმე ლეონიდ ვლასოვი, რომელიც მიმდევრებისთვის "სხიმიტროპოლიტი ზოსიმაა". მისი ბიოგრაფია წმინდანობასთან ახლოსაც არ არის: ვლასოვი ოთხჯერ არის ნასამართლევი, მათ შორის ქურდობისა და თაღლითობისთვის.
ამჟამად ის კვლავ პატიმრობაშია ტერორიზმის პროპაგანდისა და ადამიანის უფლებების ხელყოფის ბრალდებით, თუმცა მისი გავლენა იმდენად დიდია, რომ სექტა ციხის გისოსებს მიღმაც აგრძელებს არსებობას. ის საკუთარ თავს "პატრიარქს, მეფესა და წინასწარმეტყველს" უწოდებს და ამტკიცებს, რომ რუსეთის უკანასკნელი იმპერატორია.
"სამოქალაქო სიკვდილი" და დამწვარი პასპორტები
"მეფის იმპერიაში" მოხვედრის პირველი ეტაპი ცივილიზაციასთან კავშირის სრული გაწყვეტაა. სექტანტები ვალდებულნი არიან:
- დაწვან პასპორტები: ისინი ამტკიცებენ, რომ ნებისმიერი დოკუმენტი "ანტიქრისტეს ბეჭედია" და ადამიანის დანომვრას ემსახურება.
- უარი თქვან მედიცინაზე: სექტის ბანაკებში ავადმყოფობა "ცოდვებისგან განწმენდად" ითვლება, რის გამოც ბავშვები ელემენტარული სამედიცინო დახმარების გარეშე რჩებიან.
- შიმშილი და იზოლაცია: ულანოვსკის ოლქის მიტოვებულ სოფლებში მათ აქვთ ე.წ. "სასჯელის ოთახები", სადაც ურჩ წევრებს დღეების განმავლობაში საკვების გარეშე კეტავენ.
დედა - გატაცების ორგანიზატორი და "ზომბირებული" შვილები
როგორც გაირკვა, გაუჩინარებული დების დედა, ეკატერინე, წლების განმავლობაში ფარულად "მუშაობდა" შვილების ქვეცნობიერზე. სანამ მამა სამსახურში იყო, სახლში ნამდვილი რელიგიური ტერორი სუფევდა. ეკატერინე თავადაც სრულად იყო სექტის გავლენის ქვეშ და საბოლოოდ, შვილებთან ერთად გაუჩინარდა, რათა ისინი "სამყაროს დასასრულისთვის" მოემზადებინა.
დედა ბავშვებს აჯერებდა, რომ 2028 წელი გარდამტეხია – მათი მოძღვრების მიხედვით, სწორედ ამ დროს "დაიწვება სამყარო" და ყველა, ვისაც პასპორტი, ტელეფონი ან საბანკო ბარათი აქვს, ჯოჯოხეთისთვისაა განწირული. 11 წლის ირა და 18 წლის მარინა ისეთ შიშში იზრდებოდნენ, რომ მათთვის გარე სამყარო "ბოროტების ბუდედ", ხოლო სექტის ლიდერი ზოსიმა ერთადერთ მხსნელად იქცა.
უფროსი და, მარინა, სექტის ყველაზე ერთგული მიმდევარი გახდა. სწორედ მან აიძულა უმცროსი და, რომ 9 თებერვალს სკოლაში კი არა, დედასთან ერთად წინასწარ მომზადებულ სამალავში წასულიყო. გაუჩინარებამდე რამდენიმე საათით ადრე მარინამ ოჯახის წევრებს ბოლო შეტყობინება გაუგზავნა: "ჩვენს ჩატს ვშლი, კავშირი აღარ გვექნება". ეს არ იყო მოზარდის ახირება – ეს იყო სექტის მკაცრი ინსტრუქცია: "წაშალე წარსული, რათა გადარჩე". გოგონამ საკუთარი ნებით თქვა უარი ოჯახზე, რადგან სჯეროდა, რომ ამით მათ "დაწყევლილი ცივილიზაციისგან" იხსნიდა.
სხვა მსხვერპლების ისტორიები: "დედამ მითხრა, რომ მე უკვე მკვდარი ვარ"
გამოძიების პროცესში ამოტივტივდა სხვა მსხვერპლების ისტორიებიც. ერთ-ერთი გადარჩენილი წევრი იხსენებს ქალს, რომელმაც სექტის გამო გაყიდა ბინა მოსკოვში, მთელი ფული "ეკლესიას" შესწირა და შვილებთან ერთად ტყეში გადასახლდა. როდესაც უფროსმა ვაჟმა გაქცევა სცადა, საკუთარმა დედამ მას "ეშმაკეული" უწოდა და სექტის წევრებს მისი ცემაში დაეხმარა.
რატომ არის სახელმწიფო უძლური?
ყველაზე თავზარდამცემი ისაა, რომ იურიდიულად მამა თითქმის უძლურია. სანამ დედას მშობლის უფლება ჩამორთმეული არ აქვს, მას შეუძლია შვილები ქვეყნის ნებისმიერ წერტილში ატაროს.
მამა, რომელიც ამჟამად პოლიციასთან ერთად ულანოვსკის ტყეებში გოგონების კვალს ეძებს, ამბობს: "ჩემი შვილები ჩვეულებრივი ბავშვები იყვნენ, სანამ მათ ოთახში რეციდივისტის ხატები არ გამოჩნდა. ახლა მათთვის მე მტერი ვარ, რადგან პასპორტი მაქვს და ინტერნეტს ვიყენებ".
ფსიქოლოგების პროგნოზი საგანგაშოა: თუ ბავშვები სექტის ბანაკამდე მიაღწიეს, იქიდან მათი ფსიქიკის უვნებლად გამოყვანა პრაქტიკულად შეუძლებელი იქნება. მათთვის რეალობა ახლა მხოლოდ "მეორედ მოსვლის" შიში და ციხეში მჯდომი "წინასწარმეტყველის" თაყვანისცემაა.