ჯეიმს ბონდის გოგონა, 75 წლის ჯეინ სეიმური ახალგაზრდობის შენარჩუნების საიდუმლოს ამხელს - "არასდროს ვყოფილვარ დიეტაზე"

ჯეიმს ბონდის ლეგენდარულმა გოგონამ, მსახიობმა, 75 წლის ჯეინ სეიმურმა ჯანმრთელობისა და ახალგაზრდობის შენარჩუნების საიდუმლო გაამხილა. ამ თემაზე მან Daily Mail-თან ინტერვიუში ისაუბრა.

• "მიყვარს ხმელთაშუა ზღვის კვების წესი - ის ძალიან კარგად მოქმედებს და ამასთანავე გემრიელია. მოიცავს არაერთ სასარგებლო და გემრიელ პროდუქტს, როგორიცაა პომიდორი, ზეთისხილი და თევზი“, - თქვა მსახიობმა.

სეიმურმა განმარტა, რომ მსუბუქ საუზმეს ანიჭებს უპირატესობას და დღის განმავლობაში ძირითად საკვებს მხოლოდ ერთხელ, დაახლოებით 13:30 საათზე მიირთმევს.

• "დღეს ყავითა და მოხარშული კვერცხით ვიწყებ, ხოლო სრულფასოვან კვებას მხოლოდ მოგვიანებით, სადილის დროს ვიღებ. ასევე მიყვარს თევზი და ბოსტნეული. ჩემს ეზოში ბევრი მწვანილი მომყავს და მათი მირთმევა განსაკუთრებით მსიამოვნებს", - აღნიშნა მსახიობმა.

მისივე თქმით, დიეტების არ სჯერა და უპირატესობას ჯანსაღი საკვების მიღებას ანიჭებს:

"არასდროს ვყოფილვარ დიეტაზე. უბრალოდ, სწორ არჩევანს ვაკეთებ და მისი ერთგული ვრჩები. თუ საკუთარ თავს დაარწმუნებთ, რომ დიეტაზე ხართ, საბოლოოდ მოტივაციას დაკარგავთ და თავს მოატყუებთ, მაგრამ თუ იპოვით ჯანსაღ საკვებს, რომელიც ნამდვილად გიყვართ, არასდროს იგრძნობთ თავს შეზღუდულად", - ამბობს სეიმური.

სეიმურმა აღნიშნა, რომ მისი ვარჯიშის რუტინა მსუბუქი წონების აწევასა და პილატესის ვარჯიშებს მოიცავს.

"ჩემს ოჯახს გულის დაავადების ისტორია აქვს, ამიტომ რეგულარულად დავდივარ ექიმთან და ანალიზებს ვიკეთებ. გარდა ამისა, ვვარჯიშობ, ჯანსაღად ვიკვებები, მძინავს და ვცდილობ, ზედმეტი სტრესი ავირიდო თავიდან", - განმარტავს მსახიობი.

წყარო