ირანის წინააღმდეგ სამხედრო ოპერაციის დაწყებასთან ტრამპს რამდენიმე კვირა აშორებს? - "ეს ფართომასშტაბიანი ომი იქნება": რას წერს Axios?

დონალდ ტრამპი ახლოსაა ირანის წინააღმდეგ მასშტაბური სამხედრო ოპერაციის დაწყების გადაწყვეტილების მიღებასთან. ამის შესახებ ინფორმაციას გამოცემა Axios-ი წყაროებზე დაყრდნობით ავრცელებს.

• წყაროების ცნობით, ტრამპის ადმინისტრაცია ახლოსაა ირანის წინააღმდეგ მასშტაბური სამხედრო ოპერაციის დაწყების გადაწყვეტილებასთან, რომელიც ფართომასშტაბიანი ომი იქნება.

როგორც წყარო განმარტავს, ეს არ იქნება "სწრაფი, წერტილოვანი ოპერაცია, როგორიც ვენესუელაში იყო".

სავარაუდოდ, ეს ერთობლივი ოპერაცია იქნება ისრაელთან, მაგრამ უფრო მასშტაბიანი, ვიდრე “12-დღიანი ომი” 2025 წლის ივნისში, როდესაც აშშ-მა დარტყმები განახორციელა ირანის მიწისქვეშა ბირთვულ ობიექტებზე.

გამოცემის ზოგიერთი წყარო ამბობს, რომ ოპერაციის მოსამზადებლად კიდევ ბევრი დროა საჭირო. თუმცა, ერთი წყაროს თქმით, ტრამპს უკვე “მოთმინება ეწურება”, მისი გუნდის ზოგიერთი წევრის გაფრთხილებების მიუხედავად და “90%-იანი შესაძლებლობა” არსებობს იმისა, რომ ოპერაცია უახლოეს კვირებში დაიწყება.

გამოცემის თქმით, ტრამპი ირანის წინააღმდეგ დარტყმების განხორციელების გადაწყვეტილებასთან ახლოს იყო იანვრის დასაწყისში, როდესაც დემონსტრანტების წინააღმდეგ სისხლიან რეპრესიებს აკვირდებოდა,

თუმცა, მას შემდეგ აშშ-ის ადმინისტრაცია “ორმაგ ტაქტიკაზე” გადავიდა, როდესაც აშშ თეირანთან მის ბირთვულ პროგრამაზე მოლაპარაკებებს ცდილობდა და პარალელურად რეგიონში სამხედროების რაოდენობას ზრდიდა.

ახლა, გამოცემის ინფორმაციით, ისეთი ვითარებაა, რომ მოლაპარაკებები აშშ-სთვის სასურველ შედეგებს არ გამოიღებს.