"პრეზიდენტს არ ვეთანხმებოდი!" - ვინ და რატომ ჩაატარა ჯერ კიდევ მთავარსარდლობისას მის ოფისში ჩხრეკა: ზალუჟნიმ პირველად ისაუბრა ზელენსკისთან დაპირისპირებაზე

უკრაინის ელჩმა გაერთიანებულ სამეფოში, უკრაინის შეიარაღებული ძალების ყოფილმა მთავარსარდალმა, ვალერი ზალუჟნიმ განაცხადა, რომ 2022 წელს ის ხშირად უპირისპირდებოდა პრეზიდენტ ვოლოდიმირ ზელენსკის. ამის გამო კი უკრაინის უსაფრთხოების სამსახურმა მისი ოფისის ჩხრეკა ჩაატარა.

• აღნიშნულ თემაზე ზალუჟნიმ Associated Press-სთან ინტერვიუში ისაუბრა.

აღსანიშნავია, რომ ეს არის პირველი შემთხვევა, როცა ყოფილმა მთავარსარდალმა ზელენსკისთან დაპირისპირებაზე ღიად ისაუბრა.

ზალუჟნის თქმით, ჩხრეკა 2022 წლის სექტემბერში, ჩრდილო-აღმოსავლეთ უკრაინაში შეიარაღებული ძალების კონტრშეტევის დროს განხორციელდა.

როგორც ზალუჟნი იხსენებს, ვოლოდიმირ ზელენსკის შტაბ-ბინაში დაძაბული შეხვედრის შემდეგ, ის თავის კაბინეტში დაბრუნდა და რამდენიმე საათში იქ უკრაინის უსაფრთხოების სამსახურის ათობით თანამშრომელი მივიდა.

• ზალუჟნის თქმით, იმ დროს ოთახში ათზე მეტი ბრიტანელი ოფიცერი იმყოფებოდა. მისი თქმით SBU-ს წარმომადგენლებმა "არ თქვეს თუ რას ეძებდნენ ზუსტად". მან ხელი შეუშალა უსაფრთხოების ძალების წარმომადგენლებს დოკუმენტებისა და კომპიუტერების შემოწმებაში.

ყოფილმა მთავარსარდალმა გამოცემასთან ინტერვიუში განმარტა, რომ ის "პრეზიდენტის სამხედრო სტრატეგიას ხშირად არ ეთანხმებოდა."

• ზალუჟნის თქმით, ვოლოდიმირ ზელენსკისთან უთანხმოება არსებობდა "ქვეყნის დაცვის საკითხთან დაკავშირებით". თუმცა ყველაზე დიდი დავა ეხებოდა უკრაინის არმიის კონტრშეტევას 2023 წელს. ზალუჟნის თქმით, ის ჩაიშალა, რადგან ძალიან მცირე რაოდენობის ძალები იყო გადანაწილებული ფართო ფრონტზე. მისი თქმით, პრეზიდენტმა და სხვა თანამდებობის პირებმა საკმარისი რესურსი არ გამოყვეს.

უკრაინის შეიარაღებული ძალების ყოფილმა მთავარსარდალმა ხაზგასმით აღნიშნა, რომ თავდაპირველი გეგმა ზაპოროჟიეს ოლქის რუსული ჯარებისგან განთავისუფლება და შემდეგ აზოვის ზღვაში წინსვლა იყო. თუმცა, უკრაინული ძალები დიდ ტერიტორიაზე იყვნენ გაფანტულნი და საკმარისი რესურსები არ ჰქონდათ.

2023 წელს ზალუჟნის კაბინეტში მოსასმენი მოწყობილობა აღმოაჩინეს. უსაფრთხოების სამსახურის ცნობით, ის "მთავარი მეთაურის ერთ-ერთ სამუშაო ოთახში“ იყო განთავსებული, რომელიც დიდი ხნის განმავლობაში არ გამოიყენებოდა.

AP-სთან ინტერვიუში გენერალმა განაცხადა, რომ იმ ოთახში სადაც მოსასმენი მოწყობილობა აღმოაჩინეს, არანაირი საიდუმლო ინფორმაცია არ განიხილებოდა.

• ცნობისთვის, 2024 წლის თებერვლის დასაწყისში ზელენსკიმ ზალუჟნი თანამდებობიდან გაათავისუფლა და უკრაინის გმირის წოდება მიანიჭა. ზალუჟნი მოგვიანებით უკრაინის ელჩად დაინიშნა გაერთიანებულ სამეფოში.

ზოგიერთმა პოლიტიკურმა ანალიტიკოსმა ეს უკრაინის შეიარაღებული ძალების მაშინდელი მთავარსარდლის, როგორც ზელენსკის პოლიტიკური მეტოქის, პოტენციალის შეზღუდვის მცდელობად მიიჩნია.