აფხაზეთში უპილოტო საფრენი აპარატი ჩამოვარდა - რას აცხადებენ ოკუპირებული რეგიონის ე.წ. თავდაცვის უწყებაში: "მოგიწოდებთ სიმშვიდის შენარჩუნებისკენ"
ოკუპირებულ აფხაზეთში, გაგრაში დრონის ჩამოვარდნისა და აღნიშნულის გამო “ფსოუს“ საკონტროლო-გამშვები პუნქტის მუშაობის შეჩერების შემდეგ, აფხაზეთის ე.წ. თავდაცვის სამინისტრომ მოკლე განცხადება გაავრცელა სადაც ნათქვამია, რომ პუნქტის მუშაობა საჰაერო თავდაცვის სისტემების მოქმედების გამო შეჩერდა, რომლებიც სოჭზე განხორციელებულ უპილოტო საფრენი აპარატების თავდასხმას იგერიებდნენ".
- “სამინისტროში“ განაცხადეს, რომ საჰაერო თავდაცვისა და რადიოელექტრონული ბრძოლის მორიგე ძალები და საშუალებები "მომავალშიც აღკვეთენ ამოუცნობი საფრენი აპარატების მიერ საჰაერო სივრცის ნებისმიერ დარღვევას.
ე.წ. თავდაცვის უწყება მოსახლეობას სიმშვიდის შენარჩუნებისკენ მოუწოდებს და ასევე აფრთხილებს, რომ საფრენი აპარატების ან მათი ფრაგმენტების ჩამოვარდნის ადგილების აღმოჩენის შემთხვევაში არ მიუახლოვდნენ ობიექტებს, არ შეეხონ მათ და დაუყოვნებლივ შეატყობინონ შესაბამის სამსახურებს.
მედიის ინფორმაციით, 23 თებერვალს “გაგრაში, პირველი სადამკვირვებლო მოედნის ტერიტორიაზე აფეთქება მოხდა, ტერიტორიის დათვალიერებისას აღმოჩენილი იქნა ნამსხვრევები, რომლებიც წინასწარი ვერსიით უპილოტო საფრენი აპარატის ნარჩენებია".