4 ოქრო, 2 ვერცხლი და 1 ბრინჯაო - იტალიაში მიმდინარე კარატეს საერთაშორისო ჩემპიონატიდან ქართველი სპორტსმენები 7 მედლით დაბრუნდნენ
იტალიის ქალაქ ლეკოში ყოველწლიური IX საერთაშორისო ჩემპიონატი კარატეში „შავი ქამრის თასი“ გაიმართა, რომელშიც საქართველოს შოტოკან კარატე დოს კონფედერაციის გუნდმა წარმატებით იასპარეზა.
ტურნირზე, რომელიც 21-22 თებერვალს მიმდინარეობდა და სადაც 20-მდე ქვეყნის 1000-მდე სპორტსმენი იღებდა მონაწილეობას, ქართველმა კარატისტებმა საერთო ჯამში 7 მედალი მოიპოვეს: 4 ოქროს, 2 ვერცხლი და 1 ბრინჯაოს მედალი.
- უფროსებს შორის ორ დისციპლინაში, - ინდივიდუალურ კატასა და კუმიტეს აბსოლუტურ წონით კატეგორიაში I ადგილი ოქროს მედლებით აიღო ჭაბუკა მახარაძემ, - მსოფლიოს ოთხგზის და ევროპის ხუთგზის ჩემპიონმა, ასევე მრავალი საერთაშორისო ტურნირების გამარჯვებულმა, შავი ქამრის V დანის მფლობელმა სპორტსმენმა.
წარმატებით იასპარეზა 13 წლის ანდრია საათაშვილმა, ევროპის ორგზის და მრავალი საერთაშორისო ტურნირის გამარჯვებულმა სპორტსმენმა, ამჯერად, მან იტალიაში კარატეს საერთაშორისო ჩემპიონატზე 13 წლის ბიჭებს შორის ინდივიდუალურ კატაში I ადგილი და ოქროს მედალი დაისაკუთრა. ამ შედეგის გარდა მანვე ვერცხლისა და ბრინჯაოს მედლები აიღო ინდივიდუალურ კუმიტეს +55 კგ წონით კატეგორიასა და ინდივიდუალური კუმიტეს აბსოლუტურ წონით კატეგორიაში.
აღნიშნულ საერთაშორისო ტურნირზე პირველად მიიღო მონაწილეობა 11 წლის ბარბარე თავაძემ, რომელმაც I ადგილი და ოქროს მედალი მოიპოვა გოგონათა 11-12 წლებს შორის ინდივიდუალური კუმიტეს აბსოლუტურ წონით კატეგორიაში, მანვე II ადგილი ვერცხლის მედლით მოიპოვა ინდივიდუალურ კუმიტეს +45 კგ წონით კატეგორიაში.
ტურნირის ორგანიზატორი იტალიის სპორტული კარატეს გაერთიანებული ფედერაციაა.