კიმ ჩენ ინის დის პირველი გამოჩენა მას შემდეგ რაც დიქტატორის მემკვიდრედ ის არ დასახელდა - ძმამ მას ახალი თანამდებობა ჩააბარა
ჩრდილოეთ კორეის ლიდერმა, კიმ ჩენ ინმა თავისი ქალიშვილი მემკვიდრედ გამოაცხადა. აქამდე გავრცელებული იყო მოსაზრება, რომ ჩრდილოეთ კორეის ლიდერი მემკვიდრედ თავის დას, კიმ იო ჯონგს დაასახელებდა.
- 38 წლის კიმ იო ჯონგი ფხენიანში ძმას, კიმ ჩენ ინს შეუერთდა კორეის მუშათა პარტიას მეცხრე კონგრესზე. ღონისძიება ერთკვირიანი იყო და ქვეყნის პოლიტიკური კურსის განსაზღვრას მიეძღვნა. კონგრესის ფარგლებში კიმ იო ჯონგი დეპარტამენტის დირექტორად დაინიშნა, რასაც კორეის ცენტრალური საინფორმაციო სააგენტო ადასტურებს.
სამხრეთ კორეული მედიის ინფორმაციით, ის უხელმძღვანელებს პარტიის პროპაგანდისტულ მიმართულებას. აღნიშნული ფრთა მნიშვნელოვან როლს ასრულებს როგორც ქვეყნის შიდა საინფორმაციო პოლიტიკაში, ისე საგარეო სტრატეგიის ფორმირებაში.
ბოლო თვეებში ვრცელდებოდა ვარაუდები, რომ კიმ იო ჯონგის გავლენა შემცირდა. თუმცა ახალ თანამდებობაზე დანიშვნა მიუთითებს, რომ იგი კვლავ ერთ-ერთ მნიშვნელოვან ფიგურად რჩება ჩრდილოეთ კორეის პოლიტიკურ სისტემაში. ანალიტიკოსების შეფასებით, მისი დაწინაურება ხაზს უსვამს იმას, რომ ქვეყნის მმართველი ელიტა კვლავ ოჯახის ვიწრო წრეზეა კონცენტრირებული და ძალაუფლების გადანაწილება, სავარაუდოდ, შიდა შეთანხმებების საფუძველზე მიმდინარეობს.
კიმ იო ჯონგი ჩრდილოეთ კორეაში მნიშვნელოვან პოლიტიკურ და სამხედრო მხარდაჭერას ფლობს და წლებია ძმის, კიმ ჩენ ინის ერთ-ერთ უახლოეს მხარდამჭერად მიიჩნევა.