"სასწრაფოდ დატოვეთ ეს ქვეყნები" - აშშ-ის სახდეპის განცხადება, თავდასხმა ერ რიადში, აშშ-ის საელჩოზე, ისრაელის შეტევის ახალი ტალღა - ბოლო ცნობები ახლო აღმოსავლეთიდან

ახლო აღმოსავლეთში ვითარება კვლავ დაძაბული რჩება. ირანული მედიის ცნობით, ირანის სახელმწიფო მაუწყებლის, IRIB-ის შტაბ-ბინის გარშემო ორი აფეთქების ხმა გაისმა.

ისრაელის სამხედრო ძალები კი აცხადებენ, რომ თეირანზე დარტყმების ახალი ტალღა დაიწყეს.

• ასევე, ისრაელის სამხედროებმა დაადასტურეს, რომ მათ სამაუწყებლო კომპლექსი დაბომბეს, როდესაც ახალი დარტყმები განახორციელეს "ირანის ტერორისტული რეჟიმის კუთვნილი სამიზნეების“ წინააღმდეგ.

მათი თქმით, საკომუნიკაციო ცენტრი გამოიყენებოდა "სამოქალაქო საქმიანობის საფარქვეშ სამხედრო საქმიანობის წინსვლისთვის“ და „პროპაგანდისტული საქმიანობისთვის“.

მანამდე, ისრაელის თავდაცვის ძალებმა გაავრცელეს ევაკუაციის შესახებ გაფრთხილება თეირანის მცხოვრებლებისთვის, რომლებიც ქალაქის ჩრდილოეთით მდებარე ტერიტორიაზე ცხოვრობენ.

მედია აღნიშნავს, რომ ასევე, გუშინ ღამით აშშ-ისრაელის დარტყმების დროს IRIB-ის შტაბ-ბინა დაბომბეს.

• ისრაელის საჰაერო ლიბანის დედაქალაქ ბეირუთში სამიზნეების წინააღმდეგ საჰაერო დარტყმების ახალი ტალღა დაიწყო, - ინფორმაციას The Times of Israel-ი თავდაცვის ძალებზე დაყრდნობით ავრცელებს.

"საჰაერო ძალებმა ირანის ტერორისტული რეჟიმისა და „ჰეზბოლას“ ტერორისტული ორგანიზაციის წინააღმდეგ დარტყმების ფართომასშტაბიანი ტალღა დაიწყეს“, - აცხადებენ თავდაცვის ძალებში.

მანამდე, ისრაელის თავდაცვის ძალებმა ლიბანში ათობით ლოკაციის, მათ შორის ბეირუთის სამხრეთით მდებარე ორი უბნის, მაცხოვრებლებს ევაკუაციისკენ მოუწოდეს.

• აშშ-ის სახელმწიფო დეპარტამენტი კი აშშ-ის მოქალაქეებს მოუწოდებს, „უსაფრთხოების სერიოზული რისკების“ გამო, კომერციული გზებით დაუყოვნებლივ დატოვონ ახლო აღმოსავლეთის ათზე მეტი ქვეყანა, - ინფორმაციას BBC-ი ავრცელებს.

რეკომენდაცია ვრცელდება ბაჰრეინში, ეგვიპტეში, ირანში, ერაყში, ისრაელში, დასავლეთ სანაპიროზე, ღაზას სექტორში, იორდანიაში, ქუვეითში, ლიბანში, ომანში, კატარში, საუდის არაბეთში, სირიაში, არაბთა გაერთიანებული საამიროებსა და იემენში მყოფ მოქალაქეებზე.

ერ-რიადში, აშშ-ის საელჩოზე დრონებით თავდასხმა განხორციელდა.

სამინისტრო სოციალურ პლატფორმა X-ზე გამოქვეყნებულ განცხადებაში წერს, რომ თავდასხმამ, რომელიც, წინასწარი ინფორმაციით, ორი დრონით განხორციელდა, ხანძარი და შენობის მცირე მატერიალური დაზიანება გამოიწვია.

საუდის არაბეთში აშშ-ის მისიამ ჯიდაში, ერ-რიადსა და დაჰრანში მყოფი საკუთარი მოქალაქეებისთვის გაავრცელა შეტყობინება, რომ თავი შეიკავონ იმ ადგილების დატოვებისგან, სადაც იმყოფებიან და განაცხადა, რომ რეგიონში არსებულ ნებისმიერ სამხედრო ობიექტზე არააუცილებელ გადაადგილებას შეზღუდავს.

ცნობისთვის, მანამდე გავრცელდა ინფორმაცია, რომ საუდის არაბეთის დედაქალაქ ერ-რიადის დიპლომატიურ კვარტალში აფეთქებების ხმები ისმოდა. Reuters-ი წყაროებზე დაყრდნობით იუწყებოდა, რომ აშშ-ის საელჩოში, რომელიც ამ ტერიტორიაზე მდებარეობს, ხანძარი გაჩნდა.