65 წლიანი გაუჩინარების შემდეგ, რემბრანტის მილიონობით დოლარის ღირებულების შედევრი, შემთხვევით აღმოაჩინეს

ექსპერტებმა რემბრანტის დიდი ხნის დაკარგული ნახატი აღმოაჩინეს და მისი ავთენტურობა დაადასტურეს მას შემდეგ, რაც მისი ადგილსამყოფელი ათწლეულების განმავლობაში უცნობი იყო. „ზაქარიას ხილვა ტაძარში“, რომელიც 1633 წლით თარიღდება, 1960 წელს ჰოლანდიელი დიდოსტატის ნამუშევრების სიიდან ამოიღეს და მომდევნო წელს კერძო კოლექციონერზე გაყიდვის შემდეგ გაუჩინარდა.

ნახატი კვლავ გამოჩნდა, როდესაც მისმა მფლობელებმა ის ამსტერდამის რეიქსმუზეუმში (Rijksmuseum) კვლევებისთვის წარადგინეს, სადაც ორწლიანი ექსპერტიზა ჩატარდა.

მუზეუმის დირექტორმა, ტაკო დიბიტსმა, განაცხადა, რომ როდესაც მან რესტავრირებული ნახატი სტუდიაში ნახა, მაშინვე განცვიფრდა მისი „წარმოუდგენელი ძალით“. დიბიტსის თქმით, მუზეუმი ხშირად იღებს ელექტრონულ წერილებს ადამიანებისგან, რომლებიც მათ მიერ მემკვიდრეობით მიღებული ან შეძენილი ნახატების შესახებ ინფორმაციას ითხოვენ, თუმცა ამ შემთხვევაში მათ იცოდნენ, რომ ეს ნამუშევარი შესაძლოა განსაკუთრებული ყოფილიყო. ინფორმაცია ნახატის შესახებ ელექტრონული ფოსტით მიიღეს; ერთ-ერთმა კურატორმა ჩათვალა, რომ ეს იყო ძალიან საინტერესო გამოსახულება — ნახატის შესახებ 100 წელზე მეტი ხნის განმავლობაში იცოდნენ, მაგრამ ის ნანახი არავის ჰქონდა.

• მუზეუმმა ავთენტურობა დაადასტურა საღებავების შესწავლის შედეგად, რომლებიც შეესაბამება რემბრანტის მიერ იმ პერიოდში გამოყენებულ მასალებს, ასევე მხატვრობის ტექნიკითა და ფენების სტრუქტურით, რაც ასევე თანხვედრაშია მის სხვა ადრეულ ნამუშევრებთან. მკვლევრებმა აღნიშნეს, რომ ხელმოწერა ორიგინალია, ხოლო ხის პანელი სწორედ იმ პერიოდით თარიღდება.

მასალების ანალიზი, სტილისტური და თემატური მსგავსება, რემბრანტის მიერ შეტანილი ცვლილებები და ნახატის საერთო ხარისხი — ყოველივე ეს ადასტურებს დასკვნას, რომ ეს ნამუშევარი ნამდვილია.

დიბიტსის თქმით, ნახატს აქვს რემბრანტის ადრეული კარიერის „პიკის“ ყველა მახასიათებელი.

„ეს არის ძალიან მაღალი ხარისხის ნამუშევარი. ზოგჯერ რემბრანტის პორტრეტების შემთხვევაში იგრძნობა, რომ ის მათ რაოდენობისთვის აწარმოებდა, მაგრამ ამ ნახატის ნახვისას ნამდვილად გრძნობთ, რომ მან მასში სული ჩადო“, - აცხადებს დიბიტსი.

მუზეუმი ნახატს საზოგადოებისთვის ოთხშაბათიდან გამოფენს. მისი ზუსტი ღირებულება უცნობია, თუმცა რემბრანტის ნახატის აუქციონზე გაყიდვის მსოფლიო რეკორდი 2009 წელს დამყარდა და 20 მილიონ ფუნტს შეადგენს. სხვა ნამუშევრები ბოლო წლებში 8.6 მილიონიდან 12.6 მილიონ ფუნტამდე გაიყიდა, ხოლო 2015 წელს დიდმა ბრიტანეთმა კერძოდ გაყიდულ რემბრანტის ნახატს 35 მილიონი ფუნტის ფასი დაადო.

რემბრანტი 27 წლის იყო, როდესაც ეს ნახატი შექმნა. მასზე გამოსახულია ბიბლიური სცენა, როდესაც მთავარანგელოზი გაბრიელი მღვდელ ზაქარიას ეუბნება, რომ მიუხედავად ხანდაზმულობისა, მას და მის მეუღლეს შეეძინებათ ვაჟი, იოანე ნათლისმცემელი. მუზეუმის განცხადებით, რემბრანტმა ბიბლიურ ისტორიას ინოვაციური ელფერი შესძინა — ნაცვლად იმისა, რომ მთავარანგელოზი გაბრიელი თვალსაჩინოდ გამოესახა, მან მხოლოდ მიანიშნა მის არსებობაზე. ამით მან გადაუხვია დამკვიდრებულ ვიზუალურ ტრადიციებს და ამ თემის წარმოდგენის ახალი გზა შემოიტანა.

რემბრანტმა შეგნებულად შეარჩია გადამწყვეტი მომენტი, უშუალოდ მანამ, სანამ გაბრიელი თავის ნამდვილ ვინაობას გაამჟღავნებდა. ეს არის ერთ-ერთი იმ მცირე ისტორიული ჟანრის ნახატებიდან, რომელიც რემბრანტმა ამ პერიოდში შექმნა; იმ დროს ის ძირითადად პორტრეტებზე მუშაობდა, რაც ფინანსურად ძალიან მომგებიანი იყო.

წყარო