“ირანმა ტერორისტული აქტი ჩაიდინა... დაუყოვნებლივ უნდა აგონ პასუხი“ - ილჰამ ალიევი ნახიჩევანში დრონით თავდასხმაზე განცხადებას ავრცელებს

“აზერბაიჯანის წინააღმდეგ ჩადენილ ამ უსაფუძვლო ტერორისტულ აქტსა და აგრესიას არ შევეგუებით,“ - ამის შესახებ აზერბაიჯანის პრეზიდენტმა ილჰამ ალიევმა უშიშროების საბჭოს სხდომაზე განაცხადა.

• "ჩვენს შეიარაღებულ ძალებს დაევალათ საპასუხო ზომების მომზადება და განხორციელება“, - აღნიშნა ალიევმა.

"დღეს ირანმა ტერორისტული აქტი ჩაიდინა აზერბაიჯანის ტერიტორიის, აზერბაიჯანის სახელმწიფოს წინააღმდეგ. ირანის სახელმწიფომ უპილოტო საფრენი აპარატები ნახიჩევანის ავტონომიური რესპუბლიკის ტერიტორიისკენ გაისროლა. თავდასხმის სამიზნე სამოქალაქო ობიექტები იყო. აზერბაიჯანის სახელმწიფო მკაცრად გმობს ამ მახინჯ ტერორისტულ აქტს და მისმა ჩამდენებმა დაუყოვნებლივ უნდა აგონ პასუხი.

ირანელმა ოფიციალურმა პირებმა აზერბაიჯანულ მხარეს უნდა მისცენ ახსნა-განმარტება, უნდა მოიხადონ ბოდიში და ამ ტერორისტული აქტის ჩამდენებს სისხლის სამართლის პასუხისმგებლობა უნდა დაეკისროთ“, - აღნიშნა ალიევმა.

შეგახსენებთ, აზერბაიჯანის საგარეო საქმეთა სამინისტროში საპროტესტო ნოტის გადასაცემად გამოიძახეს ირანის ელჩი მას შემდეგ, რაც დღეს, 5 მარტს ნახიჩევანის აეროპორტის რაიონზე ირანის ტერიტორიიდან დრონებით შეტევა იყო. ოფიციალური ინფორმაციით, ორი ადამიანი დაშავდა.

ირანი ნახიჩევანზე დრონებით თავდასხმას უარყოფს.

იხილეთ ასევე:

• თავდასხმა ნახიჩევანზე ირანული დრონებით, ევაკუაცია ადგილობრივი სკოლებიდან - რა დეტალებია ამ დროისთვის ცნობილი
• “ეს უპასუხოდ არ დარჩება“ - აზერბაიჯანის თავდაცვის უწყება ნახიჩევანზე დრონებით თავდასხმაზე
• ფოტოები ნახიჩევანის აეროპორტიდან, სადაც ცოტა ხნის წინ ირანული დრონი ჩამოვარდა