"ევროპა საგანგებო რეჟიმზე გადადის, ირანის დარტყმის მოლოდინში" - რომელ დიდ ქალაქებს შეიძლება დაემუქროთ საფრთხე და სად გადის "წითელი ხაზები": რას წერს Politico
ევროპა საგანგებო რეჟიმზე გადადის. მას შემდეგ, რაც თეირანი დონალდ ტრამპის სამხედრო ოპერაციაში ჩართულ ქვეყნებს პირდაპირი თავდასხმით დაემუქრა, კონტინენტის დედაქალაქებში უსაფრთხოების ზომები მაქსიმალურად გაძლიერდა.
რა ძალა აქვს ირანს, რომელი ქალაქებია სამიზნეში და რა მეთოდებით აპირებს ისლამური რესპუბლიკა შურისძიებას?
"ეს ომის გამოცხადებაა" – თეირანის მუქარა
ირანის საგარეო საქმეთა სამინისტროს სპიკერმა, ესმაილ ბაღაიმ, სახელმწიფო მედიით პირდაპირ განაცხადა: ნებისმიერი ქვეყანა, რომელიც აშშ-ის სამხედრო კამპანიას მხარს დაუჭერს, ირანის წინააღმდეგ ომში ჩაბმულად ჩაითვლება.
საფრთხე მხოლოდ სიტყვიერი არაა – ირანულმა დრონებმა უკვე შეუტიეს კვიპროსს, სადაც დარტყმა ბრიტანეთის სამეფო სამხედრო-საჰაერო ბაზაზე განხორციელდა. საპასუხოდ, ბრიტანეთმა, საფრანგეთმა და საბერძნეთმა რეგიონში დამატებითი ავიამზიდები და გამანადგურებლები გაგზავნეს.
"ირანი ქაოსის ექსპორტიორია. ის ახლოსაა ბირთვული და ბალისტიკური შესაძლებლობების მოპოვებასთან, რაც ეგზისტენციალურ საფრთხეს უქმნის არა მხოლოდ ისრაელს, არამედ მთელ ევროპას,“ – განაცხადა ნატოს გენერალურმა მდივანმა, მარკ რუტემ.
ირანული რაკეტების რადიუსი: ათენიდან ბერლინამდე
ექსპერტების შეშფოთებას ირანის ბალისტიკური არსენალი იწვევს.
საშუალო რადიუსის რაკეტები (2,000 კმ): „სეჯილი“ და „ხორამშარი“ თავისუფლად სწვდება სამხრეთ-აღმოსავლეთ ევროპას – საბერძნეთს, ბულგარეთსა და რუმინეთს.
გაფართოებული საფრთხე: თუ „ხორამშარს“ მსუბუქ ქობინს დაუმონტაჟებენ, მისი რადიუსი 3,000 კილომეტრამდე იზრდება, რაც ბერლინსა და რომს დარტყმის ქვეშ აყენებს.
სარაკეტო ფარი: რუმინეთმა უკვე გააძლიერა დევესელუს სამხედრო ბაზა, სადაც აშშ-ის ანტისარაკეტო თავდაცვის სისტემებია განლაგებული.
"შაჰედები" და სათამაშო დრონები – იაფი ქაოსის იარაღი
გარდა მძლავრი რაკეტებისა, თეირანი აქტიურად იყენებს ე.წ. „კამიკაძე დრონებს“. უკრაინის ომში გამოცდილი „შაჰედების“ რადიუსი 2,500 კილომეტრია. თუმცა, ანალიტიკოსები უფრო ვერაგულ გეგმაზეც საუბრობენ: ირანმა შესაძლოა ევროპაში არსებული „მძინარე აგენტები“ გამოიყენოს, რომლებიც ჩვეულებრივი, კომერციული დრონებით შეეცდებიან სამოქალაქო აეროპორტების პარალიზებას და ქაოსის დათესვას.
ტერორისტული ჯგუფები და კიბერშეტევები
ევროპული დაზვერვის ინფორმაციით, ირანი ხშირად იყენებს კრიმინალურ დაჯგუფებებს პოლიტიკური მკვლელობებისა და დივერსიების მოსაწყობად, რათა კვალი დაფაროს. ასეთი მცდელობები უკვე დაფიქსირდა გერმანიაში, საფრანგეთში, შვედეთსა და დიდ ბრიტანეთში.
არანაკლებ საშიშია კიბერფრონტი. ირანი მსოფლიოს „კიბერ-ოთხეულში“ შედის (რუსეთთან, ჩინეთთან და ჩრდილოეთ კორეასთან ერთად). ევროკომისიაში შიშობენ, რომ თეირანი შეუტევს კრიტიკულ ინფრასტრუქტურას – ენერგოსისტემებსა და სამთავრობო არხებს.