აშშ აანონსებს, რომ დღეს ირანში ყველაზე ინტენსიური დარტყმები განხორციელდება - "ის საშინლად მარცხდება... ჩვენ ვიმარჯვებთ"
დღეს ირანში ყველაზე ინტენსიური დარტყმები განხორციელდება, - ამის შესახებ აშშ-ის თავდაცვის მდივანმა, პიტ ჰეგსეტმა ბრიფინგზე განაცხადა.
"ირანი მარტოა და ის საშინლად მარცხდება. ჩვენ ვიმარჯვებთ“, - განაცხადა ჰეგსეტმა.
- მისი თქმით, ბოლო 24 საათში ირანმა ომის დაწყების შემდეგ ყველაზე ცოტა რაკეტა გაუშვა.
"უკან არ დავიხევთ, ვიდრე მტერი სრულიად არ დამარცხდება. ამას ჩვენივე ვადებში, ჩვენი საკუთარი არჩევანის შესაბამისად ვაკეთებთ“, - აღნიშნა აშშ-ის თავდაცვის მდივანმა.
ცნობისთვის, რამდენიმე საათის წინ აშშ-ის პრეზიდენტმა დონალდ ტრამპმა განაცხადა, რომ ირანი ახლო აღმოსავლეთს დაიპყრობდა, აშშ-ს და ისრაელს პირველებს რომ არ დაერტყათ.
"ირანი ძალიან ძლიერი ქვეყანაა. ისინი ახლო აღმოსავლეთს დაიპყრობდნენ, თუ ჩვენ მათ არ დავარტყამდით“, - განაცხადა ტრამპმა ფლორიდაში გამართულ პრესკონფერენციაზე.
მისი თქმით, ირანის რაკეტებისა და სხვა იარაღის "უმეტესობა“ ამჟამად განადგურებულია. აშშ-ის პრეზიდენტის მტკიცებით, ირანიც აპირებდა ისრაელის განადგურებას, მაგრამ აშშ-მა სწორ დროს შეაჩერა ეს.
"ძალიან ვამაყობთ, რომ ამაში ვართ ჩართული. ეს მალე დასრულდება და თუ კვლავ დაიწყება, კიდევ უფრო ძლიერი დარტყმა მიადგებათ“, - განაცხადა ტრამპმა.
როდესაც აშშ-ის პირველ პირს ჰკითხეს, თუ როდის დასრულდება ირანში ომი, მან უპასუხა, რომ “ომი მალე დასრულდება, მაგრამ არა ამ კვირაში.“
"ვფიქრობ, მალე. მათ ყველაფერი დაკარგეს, მათ შორის ლიდერობა. ადამიანების უმეტესობას არც კი სმენია იმ ლიდერის შესახებ, რომელზეც საუბრობენ“, - თქვა აშშ-ის პრეზიდენტმა, ახალ უზენაეს ლიდერზე, მოჯტაბა ხამენეიზე.
მისი თქმით, თეირანის გადაწყვეტილება, აშშ-ისრაელის ერთობლივი დარტყმების საპასუხოდ მეზობელ ქვეყნებზე თავდასხმები დაეწყო, "ძალიან სულელური იყო“."ისინი ძირითადად ნეიტრალურები იყვნენ, ან სულ მცირე, არ აპირებდნენ ჩართვას“, - განაცხადა ტრამპმა და დასძინა, რომ თეირანის მხრიდან დარტყმების შემდეგ "მეზობლები ჩვენს მხარეს გადმოვიდნენ, [ირანზე] თავდასხმა დაიწყეს და საკმაოდ წარმატებითაც“.
აშშ-ის პრეზიდენტის მტკიცებით, ირანზე თავდასხმით ის ასრულებს 2015 წელს მიცემულ დაპირებას, რომ ირანს ბირთვული იარაღის მოპოვების უფლებას არ მისცემს.
წაიკითხეთ ასევე: