უახლოეს საათებში დედამიწის ატმოსფეროში შემოიჭრება და დაიწვება NASA-ს თანამგზავრი - რას ამბობენ მეცნიერები: არის თუ არა საფრთხე

NASA-ს მეცნიერები ადასტურებენ, რომ კოსმოსური ხომალდი, რომელიც წლების განმავლობაში იმ უხილავ ბარიერს სწავლობდა, რომელიც დედამიწას მზის რადიაციისგან იცავს, დღეს ჩვენს ატმოსფეროში შემოიჭრება. მიუხედავად იმისა, რომ 1,323 ფუტიანი (დაახლოებით 600 კგ) აპარატი საკმაოდ მძიმეა, სპეციალისტები მოსახლეობას სიმშვიდისკენ მოუწოდებენ.

ზუსტი დროის პროგნოზირება კოსმოსში რთულია, თუმცა NASA-ს ბოლო მონაცემებით, Van Allen Probe A ატმოსფეროში სამშაბათს, დაახლოებით 19:45 საათზე (აღმოსავლეთის დროით) შემოვა. თბილისის დროით ეს პროცესი გვიან ღამით ან ხვალ გამთენიისას არის მოსალოდნელი.

არის თუ არა საფრთხე რეალური?

ბევრს აინტერესებს, რამდენად დიდია იმის შანსი, რომ თანამგზავრის ნამსხვრევი ვინმეს დაეცეს. NASA-ს გათვლებით, ამის რისკი მინიმალურია. აპარატის უდიდესი ნაწილი ჰაერშივე, ხახუნის შედეგად წარმოქმნილ მაღალ ტემპერატურაზე დაიწვება. თუმცა მეცნიერები არ გამორიცხავენ, რომ რამდენიმე განსაკუთრებით მყარმა დეტალმა ატმოსფეროს გაუძლოს და ოკეანეში ან ხმელეთზე ჩამოვარდეს.

რატომ დაჩქარდა პროცესი?

თავდაპირველად ეგონათ, რომ თანამგზავრი 2034 წლამდე „გაძლებდა“. თუმცა, გეგმები მზის აქტივობამ შეცვალა. 2024 წელს მზემ თავის მაქსიმუმს მიაღწია, რამაც კოსმოსური ამინდის გაუარესება და ატმოსფერული წინააღმდეგობის გაზრდა გამოიწვია. შედეგად, ხომალდმა სიმაღლე იმაზე ადრე დაკარგა, ვიდრე ვარაუდობდნენ.

რას აკეთებდა თანამგზავრი?

Van Allen Probe A და მისი „ტყუპი“ 2012 წელს გაუშვეს. მათი მისია იყო იმ რადიაციული სარტყლების შესწავლა, რომლებიც დედამიწას კოსმოსური გამოსხივებისგან იცავს. აპარატებმა 7 წლის განმავლობაში იმუშავეს და მეცნიერებს ფასდაუდებელი ინფორმაცია მიაწოდეს.

ამჟამად ვითარებას აშშ-ის კოსმოსური ძალები აკონტროლებენ. რაც შეეხება მეორე თანამგზავრს (B-ს), ის ატმოსფეროში 2030 წლისთვის დაიწვება.

წყარო