ირანში დაღუპულთა რიცხვმა 3 100-ს გადააჭარბა, ისრაელმა კი თეირანზე შეტევის მორიგი ტალღა დაიწყო - "გარდაცვლილთა შორის 1 394 მშვიდობიანი მოქალაქეა"

ისრაელის თავდაცვის ძალების განცხადებით, ირანის დედაქალაქ თეირანში საჰაერო დარტყმების ახალი ტალღა დაიწყეს, - ინფორმაციას The Times of Israel-ი ავრცელებს.

თავდაცვის ძალების ცნობით, დარტყმების სამიზნე "ირანის ტერორისტული რეჟიმის ინფრასტრუქტურაა“.

ღამით ირანმა იერუსალიმის მიმართულებით ბალისტიკური რაკეტების ისროლა. რაკეტების მოგერიებით გამოწვეული აფეთქებების ხმა ღამის განმავლობაში რამდენჯერმე გაისმა.

• აშშ-ში დაფუძნებული ადამიანის უფლებათა დამცველი აქტივისტების საინფორმაციო სააგენტოს (Hrana) ცნობით, ირანში ომს, 28 თებერვლის შემდეგ, 3 186 ადამიანი ემსხვერპლა.

Hrana-ს ცნობით, დაღუპულთაგან 1 394 მშვიდობიანი მოქალაქეა, მათ შორის, სულ მცირე, 210 ბავშვია.

ორგანიზაციაში აცხადებენ, რომ დაღუპულია 1 153 სამხედრო მოსამსახურე, 639 დაღუპულის შესახებ ზუსტი ინფორმაცია, კი, ჯერჯერობით, უცნობია.