ვინ არის საქართველოში ყველაზე მდიდარი ქალი? - Forbes Georgia-ს შედგენილ 100 უმდიდრესი მეწარმის სიაში 12 ქალბატონი მოხვდა
Forbes Georgia-ს მიერ გამოქვეყნებულ საქართველოს 100 უმდიდრესი მეწარმის სიაში ქალების წილი საკმაოდ მცირეა - ასეულში მხოლოდ 12 ქალბატონი მოხვდა. თუმცა, მათი გავლენა ისეთ სტრატეგიულ სფეროებზე, როგორიცაა ნავთობტერმინალები, მშენებლობა, რითეილი და განათლება, შთამბეჭდავია.
ქალბატონების სიას ყველასათვის ცნობილი სახე, მაკა ასათიანი ხსნის, რომელიც რეიტინგში მე-12 ადგილს იკავებს.
სიაში ყველაზე ასაკოვანი წევრი 90 წლის ლაურა ლარიონია, ხატია გოგლიძე კი ერთადერთი რეიტინგში, რომლის მილიონების წყაროდაც განათლების სფეროა მითითებული.
-
ვინ არიან და რა ქონებას ფლობენ ყველაზე მდიდარი ქართველი ქალები?
- მე-12 ადგილი - მაკა ასათიანი - 806,56 მლ. ლარი
მაკა ასათიანი და მისი ოჯახი ფლობენ "მერსედეს-ბენც ჯორჯიას“. გარდა ავტოინდუსტრიისა, ის მსხვილი მოთამაშეა ენერგეტიკაშიც - კომპანია "თრეიდ სთოუნ იბერიას“ მეშვეობით ის ყულევის ნავთობტერმინალის ოპერატორი კომპანიის 30%-იანი წილის მფლობელია.
- 22-ე ადგილი ნანა აროშიძე - 496,37 მლ. ლარი
ის ქალებს შორის მეორე ადგილზეა და სამშენებლო გიგანტის, "ანაგის“ 100%-იანი წილის მფლობელია. კომპანია, რომელიც ჯერ კიდევ 1989 წელს დაარსდა, დღეს ქვეყნის ერთ-ერთი უმსხვილესი დეველოპერია.
- 47-ე ადგილს იკავებს დალი ურუშაძე - მისი ქონება 242,99 მლ. ლარად არის შეფასებული
დალი ურუშაძე მიკროსაფინანსო ორგანიზაცია "რიკო ექსპრესის“ სრული მფლობელია. მისი ბიზნესი 56 ფილიალს აერთიანებს და ფინანსურ სექტორში ქალების მიერ მართული ერთ-ერთი ყველაზე წარმატებული მოდელია.
- 59-ე ადგილს დასჯერდა ნინო ბრეგვაძე, 173,51 მლ. ლარით
ის პოპულარული სუპერმარკეტების ქსელის, "ევროპროდუქტის“ 50%-იან წილს ფლობს. კომპანია, რომელმაც ევროპული პროდუქტების იმპორტით დაიწყო, დღეს უკვე 40 ფილიალს მართავს.
- 66-ე ადგილზე გავიდა ნანა ჯანაშია, 150,42 მლ. ლარით
ნანა ჯანაშია ფლობს 19%-ს კომპანია "ბეთლაივში“. ეს არის ერთ-ერთი ყველაზე მსხვილი პლატფორმა აზარტული თამაშების ბაზარზე, რომელიც მომხმარებელს ონლაინტოტალიზატორისა და კაზინოს სერვისებს სთავაზობს. ის 44 წლისაა და ქალბატონებს შორის ერთ-ერთი ყველაზე ახალგაზრდაა რეიტინგში.
- 75-ე ადგილზე გასულ ლაურა ლარიონის ქონება 121,56 მლ. ლარია
ქალბატონი ლაურა Forbes-ის სიის ყველაზე ასაკოვანი წარმომადგენელია – ის 90 წლისაა. ის ფლობს 38%-ს კომპანია "პეის ჯორჯიაში“ (Pace Georgia). ეს კომპანია 1993 წლიდან ოპერირებს და ფოთის პორტში ტვირთების გადაზიდვასა და მართვას ახორციელებს, რაც ქვეყნის ეკონომიკისთვის სტრატეგიული სფეროა.
- 79-ე ადგილოსანი თალიკო ცირეკიძე 116,53 მლ. ლარის მფლობელია
86 წლის თალიკო ცირეკიძე "ნიკორას“ აქციების 10%-ს ფლობს. "ნიკორა“ დღეს საქართველოს უმსხვილესი სასურსათო ქსელია, რომელიც აერთიანებს ბრენდებს: "ლიბრე“, "ნუგეში“ და საკუთარი წარმოების ხორცპროდუქტებს. რეიტინგის მიხედვით, ეს ქვეყნის მე-4 ყველაზე შემოსავლიანი კომპანიაა.
- 84-ე ადგილზე მოხვდა ხატია გოგლიძე, მისი ქონება 106,11 მლ. ლარია
ხატია გოგლიძე სიაში ერთადერთი ქალია, რომლის ქონების წყაროდ განათლების სფერო სახელდება. ის ფლობს "კავკასიის უნივერსიტეტის“ აქციების 93%-ს და არის ამავე სასწავლებლის ვიცე-პრეზიდენტი. უნივერსიტეტი 1998 წელს მისმა მეუღლემ, კახა შენგელიამ დააარსა.
- 92-ე ადგილზე გასული თეა კაკაბაძის ქონება 91,45 მლ. ლარით განისაზღვრება
თეა კაკაბაძე 29%-იან წილს ფლობს კომპანია "ალტაში“ (Alta). 1997 წლიდან "ალტა“ საყოფაცხოვრებო ტექნიკის ბაზრის ერთ-ერთი მთავარი მოთამაშეა და დღეს საქართველოს 7 ქალაქში 16 დიდ მაღაზიას მართავს.
- 93-ე ადგილოსანი ნანი ანდიაშვილია, 90,33 მლ. ლარით
"აი სი არ“ ჯგუფში (ICR) 25%-ის მფლობელია. ეს არის ერთ-ერთი უმსხვილესი ჰოლდინგი სავაჭრო სფეროში, რომელიც 1995 წლიდან ოპერირებს და უამრავ საერთაშორისო ბრენდს (ფეხსაცმელი, ტანსაცმელი, ავეჯი) აერთიანებს საქართველოს ბაზარზე.
- 98-ე ადგილზე გავიდა მაკა სალუქვაძე, 80,93 მლ. ლარით
ის "ნიკორას“ (სს "ნიკორა“) 6%-იანი წილის მფლობელია. საინტერესო ფაქტია, რომ "ნიკორა“ ის იშვიათი კომპანიაა Forbes-ის სიაში, რომლის მფლობელთა შორისაც ორი ქალია (თალიკო ცირეკიძე და მაკა სალუქვაძე).
- 99- ადგილით, ქალების სიას ირინე ქოსაშვილი ასრულებს, 80,60 მლ. ლარით
ირინე ქოსაშვილი ფლობს "გუდვილის“ 95%-ს, რომელიც საქართველოში პირველი ჰიპერმარკეტების ქსელია. დღეს ქსელი თბილისსა და ბათუმში 8 დიდ ფილიალს აერთიანებს. ნახეთ კვლევა სრულად
იხილეთ ასევე: