“იმ დღეებში, როდესაც საქართველო გლოვობდა, ვიხილეთ ჰელსინკის კომისიის სხდომა - ერთი სიტყვაც ვერ მოვისმინეთ ბატონი უილსონისგან და კომისიის სხვა წევრებისგან“ - შალვა პაპუაშვილი
“იმ დღეებში, როდესაც საქართველო გლოვობდა, ვიხილეთ ჰელსინკის კომისიის სხდომა - ერთი სიტყვაც ვერ მოვისმინეთ ბატონი უილსონისგან და ჰელსინკის კომისიის სხვა წევრებისგან, რომლებსაც რომ ჰკითხო, ქართველი ერის გულშემატკივრები არიან და დღე და ღამე საქართველოზე ფიქრით უთენდებათ და უღამდებათ - შესაძლოა, ვერც კი გაიგეს რა მოხდა საქართველოში ან გაიგეს და ვერც კი გაიაზრეს,- ამის შესახებ პარლამენტის თავმჯდომარემ, შალვა პაპუაშვილმა განაცხადა, რითაც უპასუხა კითხვას, რომელიც დასავლელი ლიდერების მხრიდან, სრულიად საქართველოს კათოლიკოს-პატრიარქის, უწმინდესისა და უნეტარესის, ილია მეორის გარდაცვალებასთან დაკავშირებით, სამძიმრის არ მიღებას ეხებოდა.
- პაპუაშვილის მოსაზრებით, „ეს არის ჩვეულებრივი ნაყიდი ლობიზმი, რომელსაც არანაირი კავშირი არ აქვს მათ რაიმე ემოციურ დამოკიდებულებასთან საქართველოსთან თუ ქართველ ხალხთან“.
ამასთან, პარლამენტის თავმჯდომარემ, მადლობა გადაუხადა იმ ევროპელ ელჩებს, რომლებმაც მათი წუხილი სამების საპატრიარქო ტაძარში მოსვლით, ან პატრიარქის დაკრძალვის დღეს მოსვლით გამოხატეს.
„მეტიც, ჩვენ ვიხილეთ მაგალითად, ჰელსინკის კომისიის სხდომა იმ დღეებში, როდესაც საქართველო გლოვობდა. ერთი სიტყვაც ვერ მოვისმინეთ ბატონი უილსონისგან და ჰელსინკის კომისიის სხვა წევრებისგან, რომლებსაც რომ ჰკითხო ქართველი ერის გულშემატკივრები არიან. ამასთან, წევრებისგან, რომლებსაც რომ ჰკითხო, დღე და ღამე საქართველოზე ფიქრით უთენდებათ და უღამდებათ. ეს კიდევ ერთხელ აჩვენებს, რომ ეს ყველაფერი არის ფარსი, რასაც ჩვენ ზოგიერთი უცხოელი პოლიტიკოსის მხრიდან ვხედავთ. ეს არის ჩვეულებრივი ნაყიდი ლობიზმი, რომელსაც არანაირი კავშირი არ აქვს მათ რაიმე ემოციურ დამოკიდებულებასთან საქართველოსთან თუ ქართველ ხალხთან.
შესაძლოა, ვერც კი გაიგეს რა მოხდა საქართველოში ან გაიგეს და ვერც კი გაიაზრეს რა მოხდა. ასევე, ევროპაშიც ვიხილეთ სხვადასხვა ანგარიშების წარდგენები და ა.შ, სადაც კვლავ იყო თავდასხმა ქართველ ხალხზე ამ მწუხარების ჟამს. ეს არის, როდესაც ჩვენ ვსაუბრობთ, რომ ცივილიზებულ უფსკრულზე მიაქანებენ ევროპულ ცივილიზაციას, როდესაც პოლიტიკური დღის წესრიგი უფრო მაღლა დგას, ვიდრე ადამიანური ღირებულებები.
მინდა მადლობა გადავუხადო იმ ელჩებს, რომლებიც იმყოფებოდნენ სამების ტაძარში, როგორც გლოვის დღეებში, ისე გასვენების დღეს და გამოხატეს საკუთარი მწუხარება ამ დანაკარგთან დაკავშირებით. თუმცა, მეორე მხრივ, ვერ ვნახეთ ვერც ერთი ის ევროპელი ლიდერები, რომლებიც საქართველოში ამბავი არ მოხდება, რომ უცებ არ გამოვარდნილან და კომენტარები არ გაუკეთებიათ, ასეთი მწუხარების ჟამს კი, სიტყვები ვერ მოძებნეს. დრო ვერ მოძებნეს ან უფრო სწორად, ემოცია ვერ მოძებნეს. ეს ემოცია მათ არ ესმით, ჩვენი ემოცია, რაც გვაქვს ჩვენი ეკლესიის მიმართ, პატრიარქის მიმართ და იმ ღირებულებების მიმართ, იმ ნამდვილი ღირებულებების მიმართ, რომელზეც საქართველო დგას და არა იმ ფსევდო ღირებულებების მიმართ, რომელზეც დგანან ეს პოლიტიკური ლიდერები. ამიტომ, ესეც დიდი გაკვეთილი იყო ქართველი ხალხისთვის“,- განაცხადა შალვა პაპუაშვილმა.
პაპუაშვილის თქმითვე, პატრიარქის გარდაცვალების და პანაშვიდის დღეებში, „ქართველი ხალხი შეეცადა, ჩვენი პატრიარქისთვის დაებრუნებინა ის სიყვარული, რომელიც მან თავისი ნახევარსაუკუნოვანი პატრიარქობის პერიოდში გვაჩუქა, გვაჩვენა და მაგალითად დაგვისახა“.
„ამის მომსწრენი გავხდით ყველანი, როდესაც მილიონ ნახევარზე მეტი ჩვენი თანამოქალაქე ფიზიკურად იყო სამების ტაძარში იმისთვის, რომ თავისი მწუხარება გამოეხატა. ეს იყო მართლაც მომენტი, როდესაც მთელი ერი იყო ერთიანი ამ მწუხარებაში. გარკვეულწილად ყველა ვცდილობდით, რომ ჩვენი უმცირესი გაგვეკეთებინა, რათა ის სიყვარული, რომელსაც ჩვენ ვგრძნობდით პატრიარქის მხრიდან, საპასუხოდ ჩვენი მხრიდან გვეჩვენებინა. ვნახეთ, ასევე, ერთობა ეკლესიური, ერთობა რელიგიებს შორის. როგორც ჩვენს ქვეყანაში სხვადასხვა რელიგიის წარმომადგენლების, ისე, ზოგადად, ყველას მხრიდან, ვინც საქართველოს, მის ეკლესიას, მის პატრიარქს იცნობდა, მწუხარების სიტყვები მოვისმინეთ. ყველას მხრიდან მიუხედავად კონფესიისა, რელიგიისა. მართლაც ისტორიული პიროვნება იყო არა მხოლოდ საქართველოსთვის, არამედ მსოფლიოსთვის, ქრისტიანული სამყაროსთვის. ამ დღეებში, მათ შორის სხვადასხვა დელეგაციისგან, რომლებთანაც ცალკე გასაუბრების შესაძლებლობაც გვქონდა, ვისმენდით თუ როგორ აფასებდნენ მის ღვაწლს, თუ როგორ სცემდნენ პატივს მის წვლილს ქრისტიანული სამყაროს განვითარებაში“,- განაცხადა შალვა პაპუაშვილმა.