31 შვილი, "ჰარამხანა“ და შოკისმომგვრელი ბრალდება - ვინ არის რუსი მრავალცოლიანი მამაკაცი, რომელსაც ქალიშვილი სექსუალურ ძალადობაში ადანაშაულებს?
რუსეთში, მოსკოვის ოლქის მცხოვრები, 41 წლის ივან სუხოვი საზოგადოების ყურადღების ცენტრში არაერთხელ მოექცა თავისი უცნაური და ბევრისთვის თავზარდამცემი ცხოვრების წესით.
- მამაკაცი, რომელსაც უკვე 31 შვილი ჰყავს, თავს "პატარა ქვეყნის პრეზიდენტს“ უწოდებს. თუმცა, მისი ამბიციური გეგმების მიღმა - შექმნას "სოფელი მრავალცოლიანებისთვის“ - საიდუმლოებები და ბრალდებები იმალება.
ბავშვობა "ქუჩაში“ და ოცნება მონასტერში
ივან სუხოვის წარსული საკმაოდ ბუნდოვანია. ის მოსკოვის ოლქში დაიბადა და მარტოხელა დედა ზრდიდა, რადგან მამამ ოჯახი ადრე მიატოვა. როგორც თავად ამბობს, მისი "აღმზრდელი" ქუჩა იყო. საინტერესოა, რომ მრავალშვილიანი ოჯახის შექმნის იდეა მას ბავშვობაში, მონასტერში ყოფნისას გაუჩნდა, ხოლო მრავალცოლიანობით კავკასიაში მოგზაურობის შემდეგ დაინტერესდა.
სუხოვი ამტკიცებს, რომ მართლმადიდებელია, თუმცა მისი ცხოვრების წესი რელიგიურ კანონებს ნაკლებად შეესაბამება. 16 წლის ასაკში ის უკვე პირველი შვილის მამა გახდა, ხოლო 17 წლამდე მისგან შვიდმა გოგონამ გააჩინა შვილი.
ცხოვრება "ჰარემში“: 70 კვადრატული მეტრი და დიქტატურა
ამჟამად სუხოვი თავის სამ "ცოლთან“ და 14 შვილთან ერთად მოსკოვში, სამოთახიან ბინაში ცხოვრობს. მიუხედავად ხალხმრავლობისა, ცალკე ოთახი მხოლოდ ივანეს აქვს. ოჯახში ნამდვილი დიქტატურა სუფევს:
ცოლებს ეკრძალებათ ნებისმიერი ნივთის, თუნდაც სასმელი წყლის ყიდვა ივანეს ნებართვის გარეშე. სამოსს ქალებს თავად სუხოვი ურჩევს, რათა ისინი "ვულგარულად“ არ გამოიყურებოდნენ. ყველა შვილი სახლში სწავლობს. ბიჭებს სამხედრო კარიერისთვის ამზადებენ, გოგონებს კი - მრავალცოლიან მამაკაცებზე დასაქორწინებლად.
სუხოვი სიამაყით ამბობს, რომ მისი ორი ქალიშვილი უკვე გათხოვილია მრავალცოლიანებზე, რისთვისაც სიძეებს "გამოცდები“ მოუწყო.
საეჭვო სქემა
ბევრი ეჭვობს, რომ სუხოვის ფინანსური შემოსავლის წყარო ბავშვების შემწეობები და ე.წ. სამშობიარო კაპიტალია. ჟურნალისტურმა გამოძიებამ აჩვენა, რომ მისი რეალური შემოსავალი თვეში დაახლოებით 150 000 რუბლს არ აღემატება, რაც ასეთი დიდი ოჯახისთვის წარმოუდგენლად ცოტაა.
ერთ-ერთი ყოფილი პარტნიორი, იულია დუბილინა, ჰყვება, რომ ივანე სპეციალურად ეძებდა მარტოხელა დედებს, რომლებსაც შვილების საბუთებში მამის სახელი არ ეწერათ. ის ბავშვებს შვილობილებად იფორმებდა, რათა სახელმწიფო დახმარებები მიეთვისებინა. იულიას თქმით, ბავშვებს ოჯახში ქამრით სჯიდნენ და ცივ წყალს ასხამდნენ "აღზრდის“ მიზნით.
სუხოვი ამტკიცებს, რომ მას სულ 12 "ფაქტობრივი ცოლი“ ჰყავდა (თუმცა ოფიციალურად მხოლოდ ერთზეა დაქორწინებული). ბევრი ქალი მას დაშორდა და შვილები თან წაიყვანა. მაგალითად, იულია დუბილინამ, რომელიც მას გაექცა, ოთხი შვილი წაიყვანა.
შოკისმომგვრელი ბრალდება: "მამა ჩემზე ძალადობდა“
ყველაზე მძიმე დარტყმა სუხოვისთვის მისი უფროსი ქალიშვილის, ანას განცხადება აღმოჩნდა. გოგონამ მამა სექსუალურ ძალადობაში დაადანაშაულა. ანას თქმით, როდესაც ის 14 წლის იყო, მამამ მასზე იძალადა.
"ის ძალადობდა სხვა გოგონებზეც, მაგრამ მათ ეშინიათ ლაპარაკის", - განაცხადა ანას მეგობარმა ტელეგადაცემაში. სუხოვის წინააღმდეგ სისხლის სამართლის საქმეა აღძრული, თუმცა ის ყველაფერს უარყოფს.
"დემოგრაფიული გმირი“ თუ კრიმინალი?
სუხოვის ადვოკატი, ალექსანდრე პოჩუევი, ცდილობს მამაკაცი მსხვერპლად წარმოაჩინოს. მისი თქმით, ის ფაქტი, რომ 2026 წლის თებერვალში სუხოვს 31-ე შვილი შეეძინა, საკმარისი საფუძველია დევნის შესაწყვეტად. ის ამტკიცებს, რომ მედია მას ტერორს უწყობს.
სანამ სასამართლო საბოლოო სიტყვას იტყვის, ივან სუხოვი აგრძელებს თავისი "იდეალური სამყაროს“ მშენებლობას მოსკოვის ოლქში, სადაც მთელი სოფლის გაშენებას გეგმავს.