ისრაელმა თეირანზე ახალი იერიში მიიტანა: ირანი კი ამბობს, რომ ისრაელსა და აშშ-ის ბაზებზე დარტყმების მე-80 ტალღა დაიწყეს - რა ხდება კონფლიქტის ზონაში
ისრაელის თავდაცვის ძალების განცხადებით, ირანის დედაქალაქ თეირანში დარტყმების ახალი ტალღა დაიწყეს, რომლის სამიზნეც „ირანის ტერორისტული რეჟიმის ინფრასტრუქტურაა“, - ინფორმაციას BBC-ი ავრცელებს.
- მანამდე, გამოცემამ, ქალაქში მყოფ წყაროებზე დაყრდნობით გაავრცელა ინფორმაცია, რომ თეირანის აღმოსავლეთ, ჩრდილოეთ და ცენტრალურ ნაწილებში აფეთქებების ხმები ისმოდა.
ამასთან, ისრაელის თავდაცვის ძალების ცნობით, ირანმა ქვეყნის მიმართულებით რაკეტები ისროლა.
„თავდაცვითი სისტემები საფრთხის მოსააგერიებლად მოქმედებენ“, - აცხადებს ისრაელის თავდაცვის ძალები სოციალურ ქსელში გავრცელებულ პოსტში და მოსახლეობას სიფრთხილის გამოჩენისკენ მოუწოდებს.
რას აცხადებს ოფიციალური თეირანი?
ირანის ისლამური რევოლუციის გუშაგთა კორპუსის განცხადებით, რეგიონში აშშ-ის სამხედრო ბაზების და ისრაელის წინააღმდეგ სარაკეტო იერიშების მე-80 ტალღა დაიწყო.
ირანის ისლამური რევოლუციის გუშაგთა კორპუსის განცხადებაში აღნიშნულია, რომ მათი სამიზნე გახდა სამხედრო ბაზა ისრაელის ქალაქ საფადში, ასევე ობიექტები თელ-ავივში, კირიათ-შმონასა და ბნეი-ბრაკში.
ირანის სამიზნე ასევე გახდა აშშ-ის სამხედრო ბაზები ქუვეითში, იორდანიასა და ბაჰრეინში.