"მას არ ეგონა, რომ მოუწევდა ჩემთვის უკანალზე ეკოცნა... გადაეცით, რომ სჯობს, კარგად მომექცეს" - დონალდ ტრამპი საუდის არაბეთის პრინცის შესახებ
აშშ-ის პრეზიდენტ დონალდ ტრამპის თქმით, საუდის არაბეთის დღევანდელი ხელმძღვანელობა არ ელოდა, რომ ის ურთიერთობა ექნებოდა აშშ-სთან, როგორიც დღეს აქვს და აღნიშნა, რომ ახლა საუდის არაბეთს უწევს მასთან კარგი ურთიერთობის შენარჩუნება. აღნიშნულ თემაზე ტრამპმა მაიამიში გამართულ ღონისძიებაზე განაცხადა.
- მან შეაქო საუდის არაბეთის მეფე (სალმან ბინ აბდულაზიზი) და თქვა, რომ მათ შორის ძლიერი პირადი კავშირი ჩამოყალიბდა.
გაიხსენა ასევე წარსულში საუდის არაბეთში ვიზიტი და თქვა, რომ მეფემ განსაკუთრებული სითბო გამოავლინა მის მიმართ. "როდესაც იქ ვიყავი, დავმეგობრდით, ის ხელს მკიდებდა ფეხზე ადგომის დროს და მითხრეს, რომ ეს ერთადერთი შემთხვევა იყო, როცა მეფე ასე მოიქცა", - თქვა აშშ-ის პრეზიდენტმა.
მანვე აღნიშნა, რომ მათი ურთიერთობა დღემდე პოზიტიურია, მეფე "დიდ ადამიანად" მოიხსენია და შემდეგ მის შვილზე, საუდის არაბეთის პრინცის, მუჰამედ ბინ სალმანის შესახებ ისაუბრა.
ტრამპმა ახლო წარსულში საუდელ ლიდერებთან საუბარი გაიხსენა: "ცოტა ხნის წინ ერთად ვიყავით და მან (მუჰამედ ბინ სალმანმა) მითხრა: "იცით, საოცარია - ერთი წლის წინ მკვდარი ქვეყანა იყავით, ახლა კი მსოფლიოში ყველაზე ცხელი ქვეყანა ხართ".
"მას არ ეგონა, რომ ეს მოხდებოდა, მას არ ეგონა, რომ მოუწევდა ჩემთვის უკანალზე ეკოცნა. ეგონა, რომ მე კიდევ ერთი, მორიგი ხელმოცარული ამერიკელი პრეზიდენტი ვიქნებოდი, რომელიც ქვეყანას ჯოჯოხეთისკენ მიაქანებს, მაგრამ ახლა მოუწია, რომ ჩემს მიმართ კეთილგანწყობილი იყოს. გადაეცით, რომ სჯობს, კარგად მომექცეს".
ცნობისთვის, საუდის არაბეთის პრინცი მუჰამედ ბინ სალმანი ტრამპის მოკავშირედ მიიჩნევა.