NASA-ს ისტორიული მისია მთვარის გარშემო დაიწყო - რა არის მისი მიზანი და რას გეგმავენ ასტრონავტები?

NASA-ს მისია "Artemis II“ ოფიციალურად დაიწყო - მის ფარგლებში ადამიანები ნახევარ საუკუნეზე მეტი ხნის შემდეგ, პირველად გაემგზავრნენ მთვარის მიმართულებით.

მისიის მიზანია ეკიპაჟის უსაფრთხოდ გადაყვანა მთვარის ორბიტაზე და უკან დაბრუნება.

• მისია დაახლოებით 10 დღე გაგრძელდება. ამ დროის განმავლობაში ასტრონავტები მთვარის გარშემო იფრენენ და შემოუვლიან მის მოპირდაპირე მხარეს - იმ ნაწილს, რომელსაც დედამიწიდან ვერასდროს ვხედავთ, რის შემდეგაც დედამიწაზე დაბრუნდებიან.

მისიაში ოთხი ასტრონავტი მონაწილეობს - რიდ ვაისმენი, ვიქტორ გლოვერი, კრისტინა კოხი და ჯერემი ჰანსენი. ხელმძღვანელების განცხადებით, ფრენის დაგეგმვისას განსაკუთრებული ყურადღება უსაფრთხოებას დაეთმო.

• "ყველა შესაძლო რისკი შეფასებულია და განხილულია, რათა წარმატებისთვის საუკეთესო პირობები შევქმნათ", - განაცხადა "არტემის II“-ის მისიის მართვის გუნდის თავმჯდომარემ.

NASA-ს პროგრამის მთავარი მიზანია, ადამიანის დაბრუნება მთვარეზე 1972 წლის შემდეგ. ასევე, პროგრამა ითვალისწინებს არა მხოლოდ ასტრონავტების მოკლევადიან ვიზიტებს, არამედ მთვარეზე ხანგრძლივი ყოფნის შესაძლებლობის შექმნას, მათ შორის ინფრასტრუქტურის განვითარებასა და პლანეტის რესურსების გამოყენებას.