“სლოვაკეთი სრულად სცემს პატივს დამოუკიდებლობას, სუვერენიტეტს და საქართველოს ტერიტორიულ მთლიანობას საერთაშორისოდ აღიარებულ საზღვრებში“ - სლოვაკეთის პრეზიდენტი

“სლოვაკეთი სრულად სცემს პატივს დამოუკიდებლობას, სუვერენიტეტს და საქართველოს ტერიტორიულ მთლიანობას საერთაშორისოდ აღიარებულ საზღვრებში - ბრატისლავა გახლავთ ადგილი დიალოგისთვის, დიპლომატიისთვის, რომელიც საჭიროა იმისთვის, რომ შეიქმნას ნდობა ერებს შორის“, - ამის შესახებ სლოვაკეთის პრეზიდენტმა, პეტერ პელეგრინიმ მიხეილ ყაველაშვილთან გამართული შეხვედრის შემდეგ, პრესკონფერენციაზე განაცხადა.

• მისივე თქმით, მიხეილ ყაველაშვილთან შეხვედრაზე, ასევე, ევროკავშირის გაფართოების საკითხი განიხილეს.

პეტერ პელეგრინიმ პრესკონფერენციაზე საქართველოსა და სლოვაკეთს შორის არსებულ ურთიერთობებზეც ისაუბრა და იმედი გამოთქვა, რომ ორ ქვეყანას შორის საპარლამენტო დიალოგი გაღრმავდება.

“შეხვედრაზე ჩვენ მოვიცავით სხვადასხვა თემის ფართო სფეროები. ამჟამად, ჩვენ ვაწყდებით საერთაშორისო სამართლის დარღვევის შემთხვევებს, ხდება საზღვრების რეკონფიგურაცია დიდი ძალების მიერ და საერთაშორისო სისტემის სტაბილურობის საფუძველი ირყევა. მოხარული ვარ, რომ შემიძლია ხაზი გავუსვა და დავარწმუნო ბატონი პრეზიდენტი, რომ სლოვაკეთი სრულად სცემს პატივს დამოუკიდებლობას, სუვერენიტეტს და საქართველოს ტერიტორიულ მთლიანობას საერთაშორისოდ აღიარებულ საზღვრებში.

ქალბატონებო და ბატონებო, ბრატისლავა და სლოვაკეთი გახლავთ ადგილი, სადაც შეიძლება გარდაწყვეტილებები ვეძებოთ. ბრატისლავა გახლავთ ადგილი დიალოგისთვის, დიპლომატიისთვის, რომელიც საჭიროა იმისთვის, რომ შეიქმნას ნდობა ერებს შორის. სახელმწიფოებს შორის ეფექტური დიპლომატია და გულახდილი დიალოგი გვაძლევს საშუალებას, რომ შევიმუშაოთ მოგვარებები, ხანგრძლივი გადაწყვეტილებები საერთაშორისო გამოწვევებთან დაკავშირებით.

ჩემი ერთ-ერთი პრიორიტეტი გახლავთ ევროკავშირის გაფართოების პოლიტიკა. არიან ქვეყნები, რომლებიც გამოხატავენ სურვილს ევროკავშირში გაწევრიანებაზე და ისინი მუშაობენ რეფორმებზე, რათა კრიტერიუმი დააკმაყოფილონ. მეორე მხრივ, გაფართოება რთული პროცესია, მაგრამ ჩვენ უნდა ვცეთ პატივი იმას, რომ ეს არის სუვერენული გადაწყვეტილება ნებისმიერი ქვეყნისა, რათა გააგრძელონ მოლაპარაკებები. ქვეყნის გადასაწყვეტია, როგორ დაინახავს თავის ევროპულ პერსპექტივას. ჩვენ გახსნილად განვიხილეთ აღნიშნული თემები ბატონ პრეზიდენტთან. დავარწმუნე ის, რომ სლოვაკეთი გახდა დიდი ევროპული ბაზრის ნაწილი და განვითარებული ქვეყნების ევროპული ოჯახის წევრი.

კიდევ ერთხელ, მოესალმებით, ბატონო პრეზიდენტო, სლოვაკეთში. ძალიან დიდი მადლობა ღია და კონსტრუქციული დისკუსიისთვის, რომელიც ჩვენ გავმართეთ. ერთმანეთს გავუზიარეთ ჩვენი ხედვები მიმდინარე სიტუაციაზე სლოვაკეთში, საქართველოში და ევროკავშირში. მოხარული ვიქნები, როდესაც თქვენი ვიზიტი კიდევ ერთი სტიმული იქნება შემდგომი ჩვენი ურთიერთობის განვითარებისთვის. მე ვიმეორებ, რომ ბრატისლავა გახლავთ ის ადგილი და სივრცე, სადაც მყარდება უკეთესი ურთიერთობები, მოლაპარაკებები მიმდინარეობს მშვიდობის საკითხებზე. ძალზე მოხარული ვარ, რომ ჩვენ მივესალმებით საქართველოს პრეზიდენტს და გახსნილად ვიხილავთ შიდა პოლიტიკის და მსოფლიო პოლიტიკის საკითხებს,“ - განაცხადა პეტერ პელეგრინიმ.

• სლოვაკეთის რესპუბლიკის პრეზიდენტის თქმით, საქართველო რეგიონის სტაბილიზაციის პროცესში ძირითად როლს თამაშობს.

“მივესალმებით სომხეთსა და აზერბაიჯანს შორის კონფლიქტის მშვიდობიან მოგვარებას. საქართველო ამ რეგიონის სტაბილიზაციის პროცესში ძირითად როლს თამაშობს. სლოვაკეთი მონაწილეობას იღებს ევროპულ ინიციატივაში “გლობალური ჭიშკარი“ და ჩვენ დაინტერესებული ვართ, ავაშენოთ ინფრასტრუქტურა. საქართველოს გააჩნია სტრატეგიული პოზიცია ამ მარშრუტზე აზიასა და ევროპას შორის - ტრანსპორტის სფეროში, ასევე ენერგომატარებლების იმპორტის საკითხში. საქართველოს აქ ვერავინ გამოტოვებს და გვერდს ვერ შემოუვლის. ამიტომ, ძალიან კარგი ურთიერთობები გვაქვს საქართველოსთან, რადგან მან შეიძლება, ითამაშოს მნიშვნელოვანი როლი ამ ჭრილში მომავალშიც.

ჩვენ ასევე გვაქვს სურვილი მოვაგვაროთ მეტი კონფლიქტი, რადგან ერთ-ერთი ეხება სლოვაკეთს და შევთანხმდით იმაზე, რომ კონფლიქტთან დაკავშირებით დიპლომატიური გადაწყვეტილება უნდა იქნეს მიღებული, რადგან მიმდინარე სიტუაციის თვალსაზრისით, დიპლომატიის გარეშე ეს კონფლიქტი სამხედრო გზით ვერ დასრულდება - ეს უკრაინას გაანადგურებს. ვხედავთ, რომ სამოქალაქო პირები იხოცებიან, დიდი რაოდენობის ჯარისკაცს კლავენ. არავის ინტერესში შედის, რომ ეს პროცესი გაგრძელდეს.

ჩვენ შევაფასეთ კონფლიქტი შუა აღმოსავლეთში, ირანში - ამ ომს უდიდესი გავლენა აქვს გლობალურ ეკონომიკაზე. თუ ის რამდენიმე კვირაში არ დასრულდება, უზარმაზარი გავლენა ექნება არამხოლოდ მსოფლიო ეკონომიკაზე, არამედ მან შეიძლება სლოვაკეთის ეკონომიკაზე მოახდინოს გავლენა. კონფლიქტის გახანგრძლივების შემთხვევაში სლოვაკეთს ეკონომიკური ზრდა არ ექნება, რამაც შეიძლება მოიტანოს 6%-ით ეკონომიკური ვარდნა.

რაც შეეხება უკრაინაში კონფლიქტს და მიმდინარე საომარ მოქმედებებს. გვინდა, რომ დიპლომატია იყოს ჩართული, თავიდან იქნეს აცილებული ესკალაცია - სხვა შემთხვევაში ვიხილავთ კონფლიქტებს მსოფლიოს სხვადასხვა ნაწილში, რაც საფრთხე იქნება მთელი მსოფლიოსთვის“, - განაცხადა სლოვაკეთის პრეზიდენტმა.

იხილეთ ასევე:

• სლოვაკეთის პრეზიდენტის სასახლეში მიხეილ ყაველაშვილის დახვედრის ოფიციალური ცერემონია გაიმართა