ინდონეზიის სტრატეგიულ სრუტეში ჩინური წყალქვეშა დრონი იპოვეს - ვარაუდობენ, რომ ჯაშუშური მოწყობილობა საიდუმლო ინფორმაციას აგროვებდა

ინდონეზიაში, გილი ტრავანგანის სანაპიროზე, ადგილობრივმა მეთევზემ დიდი ზომის წყალქვეშა ობიექტი იპოვა - გავრცელებული ინფორმაციით, საქმე შესაძლოა ჩინურ წყალქვეშა ჯაშუშურ დრონს ეხებოდეს, რომელიც საზღვაო მონაცემების შეგროვებისთვის გამოიყენება.

ინციდენტმა ადგილობრივებში შეშფოთება გამოიწვია, რადგან მსგავსი მოწყობილობის აღმოჩენა ტურისტულ ზონასთან უსაფრთხოების საკითხებს აჩენს. ოფიციალურ უწყებებს ამ დრომდე დეტალური კომენტარი არ გაუკეთებიათ.

ადგილობრივი პოლიციის ინფორმაციით, სამართალდამცავებმა ტერიტორია მალევე შემოსაზღვრეს და უსაფრთხოების ზომები გაამკაცრეს. პირველადი შემოწმების შედეგად დადგინდა, რომ ობიექტში არც რადიოაქტიური და არც ასაფეთქებელი ნივთიერებების კვალი არ აღმოჩნდა.

გავრცელებული ინფორმაციით, აღმოჩენილი მოწყობილობა შემდგომი შესწავლისთვის ახლომდებარე საზღვაო ბაზაზე გადაიტანეს.

• წყალქვეშა მოწყობილობაზე დაფიქსირდა მსოფლიოში ერთ-ერთი უდიდესი გემთმშენებელი კომპანიის, China Shipbuilding Industry Corporation-ის ლოგო და კვლევითი ინსტიტუტის ჩინური იეროგლიფები.

ცნობილია, რომ ჩინური უპილოტო წყალქვეშა აპარატები (UUV) აქტიურად მოქმედებენ ლომბოკის სრუტის ღრმა წყლებში, სადაც სპეციალური მოწყობილობებით გადაადგილდებიან და მნიშვნელოვან წყალქვეშა მონაცემებს აგროვებენ.

ეს სრუტე საკმარისად ღრმაა იმისთვის, რომ მასში სამხედრო წყალქვეშა ნავები და დიდი საზღვაო გემებიც თავისუფლად გადაადგილდნენ, რაც მას სტრატეგიულად მნიშვნელოვან მარშრუტად აქცევს წყნარი ოკეანესა და ინდოეთის ოკეანეს შორის.

ექსპერტების შეფასებით, წყალქვეშა დრონები ჩინეთს აძლევს შესაძლებლობას იაფად და ფარულად აკონტროლოს წყალქვეშა სივრცე, შეაგროვოს მონაცემები, შექმნას რუკები და საჭიროების შემთხვევაში გავლენა მოახდინოს იქ მიმდინარე პროცესებზე.

წყარო