სანქტ-პეტერბურგში დააკავეს რუსი მუსიკოსი, რადგან უკრაინელი ჟურნალისტი, დიმიტრი გორდონი ეგონათ - "სახის ამომცნობმა სისტემამ ჩემში გორდონი დაინახა“
სანქტ-პეტერბურგის მოსკოვის ვაგზალზე უჩვეულო ინციდენტი მოხდა: პოლიციამ ჯგუფ "თავისუფლება მოდაზე მნიშვნელოვანია“ (Свобода важнее моды) ლიდერი, დიმიტრი გალიამინსკი დააკავა. მიზეზი სახის ამომცნობი სისტემა გახდა, რომელსაც მუსიკოსი ძებნილ უკრაინელ ჟურნალისტში, დიმიტრი გორდონში აურია.
დაკავების დეტალები
როგორც გალიამინსკი თავის Telegram-არხზე წერს, ის "ვაგზალზე" გადაადგილდებოდა, როდესაც სამართალდამცველები დაედევნნენ. მუსიკოსი თავიდან ფიქრობდა, რომ თაყვანისმცემლები ავტოგრაფისთვის მისდევდნენ, თუმცა რეალობა სხვაგვარი აღმოჩნდა.
"მიახლოვდებიან პოლიციელები და ელვისებურად მაკავებენ. სახის ამომცნობმა სისტემამ ჩემში ჟურნალისტი დიმიტრი გორდონი ამოიცნო“, - ამბობს მუსიკოსი. გალიამინსკის თქმით, ერთ-ერთი პოლიციელი მის თმასა და წვერსაც კი შეეხო, რათა შეემოწმებინა, ხომ არ იყენებდა პარიკს ან სხვა საშუალებებს. საბოლოოდ, მუსიკოსი გაათავისუფლეს.
ოფიციალური კომენტარი
რუსეთის შინაგან საქმეთა სამინისტროს ჩრდილო-დასავლეთის სამმართველოში აცხადებენ, რომ ეს სისტემის არაკორექტული მუშაობის პირველი შემთხვევაა. უწყების პრესსამსახურის ხელმძღვანელის, ელენა შელიხოვას განცხადებით, "საშინელი არაფერი მომხდარა, უბრალოდ მუსიკოსი ძალიან ჰგავს ჟურნალისტს“.
დიმიტრი გორდონი: ცნობილი უკრაინელი ჟურნალისტია, რომლის YouTube-არხს 3.6 მილიონზე მეტი გამომწერი ჰყავს. 2022 წლიდან გორდონი რუსეთში ძებნილად არის გამოცხადებული. 2024 წლის ივლისში მას დაუსწრებლად 14 წლით თავისუფლების აღკვეთა მიუსაჯეს "ომის გაჩაღებისკენ მოწოდებისა“ და რუსული არმიის შესახებ "ფეიკების“ გავრცელების ბრალდებით.