"მის მარიხუანა" - იახტები, მდიდრული წვეულებები და მილიონები: ვინ არის სილამაზის დედოფალი, რომელიც ნარკოტიკებით ვაჭრობის საქმეზე დააკავეს
ბრაზილიაში მასშტაბური სპეცოპერაცია, სახელწოდებით "ოპერაცია ფუფუნება“, სკანდალური დაკავებით დასრულდა. პოლიციამ 36 წლის ინფლუენსერი და სილამაზის დედოფალი, სარა მონტეირო დააკავა. მას ბრალად ორგანიზებული დანაშაულებრივი ჯგუფის წევრობა და ნარკოტიკებით ვაჭრობის შედეგად მიღებული ფულით მდიდრული ცხოვრების დაფინანსება ედება.
მდიდრული ცხოვრება
- საინტერესოა, რომ დაკავებამდე სულ რამდენიმე კვირით ადრე, მონტეირო თავის 107 000 გამომწერს სოციალურ ქსელში ჰპირდებოდა, რომ 2026 წელი მისთვის "კარმული წელი" იქნებოდა.
"წარმატებები ყველას, ვინც ჩემს განადგურებას ტყუილუბრალოდ ცდილობდა, მოუთმენლად ველოდები მოსავლის აღებას!“ - წერდა ის ინსტაგრამზე.
როგორც ჩანს, "მოსავალი" პოლიციის ხელბორკილები აღმოჩნდა. გამომძიებლების თქმით, მისი იახტები, Tomorrowland-ის ფესტივალზე ვიზიტები და ძვირადღირებული ავტომობილები სრულ წინააღმდეგობაში მოდიოდა ქალის ოფიციალურ შემოსავლებთან.
გამოძიების დეტალები
პოლიციის ინფორმაციით, დანაშაულებრივ სინდიკატს, რომელიც მარიხუანის ტრეფიკინგით იყო დაკავებული, სარას ქმარი ხელმძღვანელობდა.
მონტეირო ჯგუფის "ფინანსურ ბირთვში“ შედიოდა და შავი ფულის ლეგალიზაციას ფუფუნების საგნების ყიდვითა და მოგზაურობებით ახდენდა. სპეცოპერაციის ფარგლებში ამოღებულია 5.9 ტონა მარიხუანა და 20 მდიდრული ავტომობილი (მათ შორის Porsche და BMW).
ასევე დაფიქსირებულია 2.1 მილიონ დოლარზე მეტი საეჭვო გზავნილი, რომელთა წარმომავლობაც დაუსაბუთებელია. პოლიციის კომისარ რაფაელ ჰერერას განცხადებით, კრიმინალური დაჯგუფება სულ მცირე, წელიწად ნახევარია მოქმედებდა.
ამ დროისთვის დაკავებულია 24 პირი .გაყინულია დაახლოებით 9 მილიონი ფუნტის ღირებულების აქტივები.
სამართალდამცავები კვლავ ეძებენ სილამაზის დედოფლის მეუღლეს, რომელიც მიმალვაშია. სარა მონტეიროს, რომელიც "მის უბერლანდია 2025"-ის ტიტულის მფლობელია, ახლა ნარკო ტრეფიკინგისა და ფულის გათეთრების მუხლით მრავალწლიანი პატიმრობა ემუქრება. მედიაში კი ახლა მას "მის მარიხუანას" უწოდებენ.